Ye siempre ua procisson, que acumpánhan centenas de pessonas se nó miles de todo lado. Hai giente que ben de mui loinje por deboçon a Nuossa Senhora. Tamien eiqui cumo an Fátima, las pessonas bénen a cumprir las sues pormessas. Hai quien cuide que ye de giente sien cultura, cumo se solo eilhes fússen ls duonhos de la rezon i de la berdade, mas ye de giente cun sentimentos, cun sadorie, que se calhar outros nun ténen, inda que cúiden que si la ténen.
Fui un mar de giente anque fusse die de sumana i todos deberiemos pensar nestas realidades, talbeç respeitessemos mais ls outros, nós poderemos tener rezon mas naide ten “la rezon” . Para ls mirandeses, l Naso debe de ser l sitio de ancontro de todas las quemunidades de Tierras de Miranda. I cumo hai miles de anhos era l sitio adonde las bárias tribos de un miesmo pobo se ajuntában ne fin de las colheitas, para porparáren la passaige de l’Ambierno, tamien agora debe de ser, l dar de las manos para porparar l feturo.
La nuossa cultura ye mui rica, que mirando para las eimages de l bideo saibamos ser di(g)nos i ourgulhosos deilha.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
