L Menistro de la Agricultura stubo an Mirandela para assinar alguns protocolos cun Associaçones de Agricultores i tamien para falar subre ls nuobos zafios que se pónen als nuossos lhabradores, percipalmente ne l feturo a seguir a la PAC (Politica Agrícola Comum), que bai a ser altarada a partir de 2013.
La Cooperatiba Ribadouro , de Sendin, stubo tamien alhá, inda que ls protocolos tubíssen mais a ber cul azeite i cul miel, mas hai que star an todo lado que se trate de agricultura, para melhor defender la Cooperatiba i ls associados deilha.
Las bárias associaçones de l miel, de l Nordeste agrupórun-se para melhor tratáren de ls sous porblemas i las associaçones de azeite ampeçórun a studar l melhor modo de fazéren l miesmo. Hai quien seia aontra las fusones, mas l mal nun stá nas fusones, mas an derigentes menos sérios, que solo pénsan neilhes.
Tamien Sendin ten muita associaçon i yá era tiempo de pensar mais neilhas, que an acupar ls lugares de las direçones, quando la más de las bezes, ye solo para star alhá. L feturo bai a ser defícele i solo será possible se las pessonas se ajuntáren, deixando l’antresse de ls sous partidos apartado de las anstituiçones.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
