Pássan-se horas i horas nas telbisones a amostrar jogos de bola i quanto mais amportantes son ls clubes i ls jogadores, mais tiempo se passa culs jogos i apuis a amostrar las jogadas. Ls ninos que tamien jógan sien cobrar nada i que muito gustaríen de se ber na telbison, son squecidos, mas l HOIJE quier que ls nuossos ninos tamien ánden puls bideos de la anternete i ampeçou hoije a amostrar un cachico. Este bideo ye de l jogo de l Sendin-Mãe de Água de l último Demingo.
Inda nun stabamos porparados para filmar l jogo i l tiempo tamien nun ajudaba, mas fazímos l que mos fui possible. Cultura nun ye solo cantar, fazer triato ou fazer bersos, çporto ye tamien amportante i se hai ls que nun gústan de bola, tamien hai ls que nun gústan de outras cousas i nun ye por esso que uas son mais amportantes que las outras. Se calhar ye mais amportante gastar l nuosso denheiro cun estes ninos, que deliciórun la giente que stubo nesta manhana de Demingo, ne l campo de l Sendin, que cun libros que cústan furtunas i que nien nun anho ls léien metade de la giente que fui a ber la bola.
