MIRANDÊS-2
Mais un dérbi de l Praino, desta beç an sendin, ne l campo Valentim Guerra, para l campeonato çtrital de futebol de la A.F .B. Fui un jogo muito eiquelibrado cun las dues eiquipas a fazéren todo por ganhar l jogo, nun fura ser l Sendin-Miranda. L campo staba an muito malo stado i solo jogadores que jógan por gustar de bola ye que jogaríen. Mas hai miesmo que jogar, porque apuis nun hai tiempo para repetir ls jogos i estes jogadores nun gánhan para podéren bibir de bola i a nun ser als Demingos nun hai jogo para naide.
Este jogo debe serbir para fazer pensar muita giente, percipalmente ls outarcas i ls que ténen a sou cargo l poder de gastar ls denheiros públicos. L futebol, quier muitos gústen ou nó, inda ye un çporto que faç falta nas nuossas tierras porque ye ua de las poucas cousas que faç cun que la giente se ajunte i cumbiba to las sumanas. Nun se trata de ua fiesta de un ou dous dies, mas de ua atibidade que faç andar muita cousa. Mas hai que melhorar las cundiçones i nun béngan dezir que nun hai denheiro, porque gasta-se muito i mal.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
