Esta ye ua de las amboras mais amportantes para l studo de ls pauliteiros de l Praino i percipalmente para l studo de ls pauliteiros de Sendin. Ser agabarrion ye malo, mas ser houmilde an eicesso ye ser burro. Ora nós nun queremos ser burros i pensamos que trasmitir l que se sabe ye ua oubrigaçon. Ls pauliteiros de tierras de Miranda, na maiorie de las tierras, nun usában saia. Na maiorie de las tierras usában calças i miesmo ls chapéus éran anfeitados de modos çfrentes. Sendin, assi cumo San Martino, bestíen-se siempre cun calças i palmitos ou prumas ne ls chapéus. L lenço çpindurado fazie tamien siempre parte de l traje.
Neste bideo grabado para un porgrama de la RTP , an 1971, podeis ber cumo era.
Ne ls retratos que bos amostramos a seguir podeis ber cumo éran ls grupos de pauliteiros de Sendin. Apuis de deixarmos de acumpanhar ls pauliteiros de Sendin, aparecírun uns antendidos que tratórun de ls bestir cumo ls de Cércio i Dues Eigreijas. Perdiu-se la nuossa eidentidade, mas mirai bien para l grupo de ls mais pequeinhos i dezi a ber se nun era tan ou mais guapo que cun las saias?
1957
1964
1980
Mas houbo siempre quien pensaba que sabie mais que ls outros i balendo-se de la politica, eilebában las sues eideias i çtruíen las de ls outros. Tamien hoije assi sucede.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
