Na Eidade Média las tierras zde Sendin a Algoso éran tierras de l Rei. A quando de las anquiriçones de D.Fonso III, assi parece que serie, yá que las anquiriçones fúrun para se saber se, las tierras an que habie dúbedas, serien ó nó de l Rei. Sendin nun aparece nas anqueriçones, mas por todo l que se sabe, pertenecerie a Algoso.
La AEPGA (Associaçon de ls burros), fizo dous dies de atibidades a que chamou “Por tierras de l Rei”.
Un grupo cun l presidente de Atanor
Las atibidades fúrun bárias, la precura de las formas de artesanato, daprendéren a arar cun la burra, la fala cun la giente de Atanor i jogos eiducatibos.
Fizo-se tamien ua caminada até l castilho de Algoso, cun la passaige por la puonte romana subre l rio Angueira, onde se comiu l almuorço.
A daprendéren a arar cun ua burra
Partecipórun muitos moços i moças de bárias tierras de ls alredores de Sendin, Atenor, Fuonte Aldé i mesmo de muitas outras de loinje. Tamien habie giente maior cun ls filhos i alguas que benírun de l stranjeiro.
A béren las pieças de artesanato
Hoije a la tarde fui l assalto al Castilho, que mais nun fui que la caminada, siempre a subir, zde l riu angueira até Algoso, cun ls burros a lebar ls mais pequeinhos i cun la cumpanha de ls gueiteiros, que tocában las modas de l praino.
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
