Mais de 80 alunos de la Scuola Suprior de Eiducaçon de l Anstituto Suprior de Bergáncia fazírun hoije ua besita de studo a Sendin. Durante toda la tarde corrírun la poboaçon i falórun cun bárias pessonas. Debedírun-se an grupos i cada un tenie la sue ancumbéncia para la recuolha de dados an mirandés.
L grupo camino abaixo
Ls grupos fúrun tamien, a la beç, a besitar la Casa de la Música onde Mário Correia l amostraba l património que alhi se ancontra, para eilhes podéren ber i tirar notas subre l que era mais amportante para la sue formaçon, al mesmo tiempo que le fazie ua palhestra subre la musica i las tradiçones de la nuossa tierra.
L grupo ne l ancoradouro
Apuis quejírun ir al riu i dar un passeio puls carreirones, mas cumo las carreiras éran grandes, tubírun que fazer la maior parte de l camino de Mundin, a pie. Ir inda nun fui mui custoso, mas tener que subir até al alto ye que fui pior. L persidente de la Junta, Norberyto Marcos acumpanhou-los i tubo que traer alguns cun la sue carrinha.
I agora cumo bai a ser para subir
Alhá íban cun las sacas a las cuostas
L HOIJE stá siempre persente an quaije todas las atibidades que se fázen an Sendin i cumo siempre, eiqui bos trai mais esta ambora de l que se bai passando por Sendin. Ls retratos solo son de l passeio, porque era amportante amostrar las arribas chenas de giente moça.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
