Anquanto uns poucos se preacúpan cun ancuntrar modos de fazer passar la crise i pássan l tiempo a scutir i a fazer reuniones para ber se há-de ser desta maneira ou daqueilha, se ten que ser para salbar ricos ou probes, para anteletuales ou nó, porqui hai ls que naide oube, mas que cuntínan a fazer algo por las nuossas aldés.
La anti(g)a fuonte de l lugar
La anti(g)a fuonte de l lugar ye hoije un guapo sitio onde se puode passar un rato, ou aperciar l anti(g)o artimanho de tirar auga. Lougo alhi cerquita stá la capielha reparada de nuobo i cun un muro de piedra de la region de Atanor, a fazer un guapo cunjunto cun las paredes de la capielha.
La capielha
Mas de todo l cunjunto faç inda parte un parque de merendas i un parque anfantil onde ls turistas que durante todo l anho bénen a las atibidades de la AEPGA (Associaçon para perserbaçon de ls burros), puoden antretener ls sous ninos i traer-los a cumbibir cun ls de Atanor.
L parque de merendas i l parque anfantil
Ye amostrando todo esto que se faç un buono serbício para que las pessonas téngan cunfiança ne l feturo i nó agabando la nuossa sabedorie ou l que ye de ls outros. Ye amando la nuossa tierra i region, que podemos ser eisemplo para cumbatir la crise.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
