Éran por ende las onze horas d’hoije i alhá fumos a la einouguraçon de l parque de merendas de Teixeira, ne l riu Angueira. Habie giente de las aldés al redor i até ua tie de 93 anhos, que yá se lembraba de naquel sitio tener habido un molino, casas i até muito mais tarde ua labadora de piedras de l riu.
La tie ye la segunda de lado dreito
Dezie la tie i cun rezon, que la bida stá siempre a demudar i l die que há-de benir nun sabemos cumo será, por esso hai que bibir cada die, de bien cun todos i que estas fiestas dében fazer-se, porque podemos nun bibir outras, cumo acunteciu cun las moças de l sou tiempo, que yá nun stan acá. La tie andaba por lhi i falaba cumo se tubisse 60 ou 70 anhos.
L parque
Las outoridades
L parque queda mesmo cerquita de l riu i mais abaixo hai ua pequeinha presa, mas que todos dezíen que habie de subir mais, para retener mais auga. Ne l Berano, muita giente de todas las aldés alredor de Teixeira, ban alhi a pescar, a nadar ou a passar un rato i a quemer la merenda.
L almuorço
La giente fui até al riu, na carreira de la câmara de Miranda de l Douro, que la amprestou para íren ls que nun teníen carro. Ne l final houbo un almuorço, na Associaçon de Teixeira, cun buona bitela mirandesa, guisada a la moda anti(g)a i folar para ampeçar, regados cun buono bino de las nuossas tierras.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
