Yá poucos se lembrarán de cumo éran las Eiras de Sendin. Las Eiras éran zde la rue de Camino Prado a la Casa de la criança i zde la Scuola bielha a la Copratiba, ancluindo l spácio onde esta fui costruida. Las Eiras éran un de ls patrimónios mais amportantes de la Freguesie i durante muitos anhos fui la maior riqueza de l pobo.
Un retrato anti(g)o de las Eiras
Era tan amportante, que fizo l pobo alborotar-se muita beç para l defender. Staba alhi la sigurancia de muita familhia. Tal cumo hoije, quando hai algo de balor i lougo aparécen ls que l quíeren arrebanhar, tamien nesse tiempo houbo quien quejisse tomar cunta de las Eiras, mas inda bien que l pobo soubo rejistir.
Era l prado de todos
Las mulas i las burras éran l ganha pan de la maiorie de la giente que solo tenie las Eiras para apacentar ls animales. Mas las Eiras éran tamien l sitio de la trilha i onde ls ninos i ninas podíen saltar an liberdade. Falo-bos nesto porque me lembrou de l tiempo de nino en que, na Quaresma, cun ua cesta na mano, corriemos las Eiras a apanhar las floricas para botar na precisson de l folar.
Las floricas cumo estas
Las Eiras serbírun para muita giente bibir, até als anhos sessenta de l séclo passado i serbírun apuis, porque ls nuossos abós las defendírun, para hoije bermos alhá la Copratiba, La Casa de l Pobo, l Quartel, l Ciclo, la Scuola, la scuola Anfantil, l Centro de Salude, l Quartel de ls bumbeiros, l Lar i l Parque.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
