Stamos na Quaresma, nun bou eiqui a dezir l que ye la Quaresma, porque esso se puode saber, percurando nua anciclopédia ou na anternete, serie amportante screbir eiqui, porque hai quien nun saba ou nun tenga tiempo de percurar, mas l que you quiero mostrar hoije, son alguns jogos que se fazíen neste tiempo quando you era pequeinho.
L pion
L córrio
Habie jogos para todas las alturas de l anho i na scuola de Sendin, resolbírun ansinar alguns als alunos i l HOIJE fui a ber, para lembrar eiqui esses jogos i mostrar cumo ls alunos gústan de partecipar. Hoije, ls rapazes jogórun l pion i las ninas las necras.
La porsora a ansinar a jogar las necras
L jogo de l pion era de muitas maneiras, mas fui perciso ansinar purmeiro ls alunos a atirar l pion cun la baraça. Apuis daprendírun a apanhar-lo cun la mano i a jogar l córrio, que ye fazer un córrio i poner un pion ne l meio i todos ban botando l sou pion para acertar ne l que stá ne l meio.
Las ninas yá jógan eilhas solas
L jogo de las palmas
L jogo de las necras tamien ye jogado de bárias maneiras, mas hoije daprendírun a saber botar las necras i a aparar-las cun ua ou las dues manos. Ls maiores jogában l cântaro, l anielho, romeu-romeu, arranca-nabiça, corre-lenço i muitos mais, porque nun se podie dançar ne l tiempo de la Quaresma.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
