Hoije ye l die de la metereologie i onte fui l die de l’auga, dues cousas de las mais amportantes de ls dies d’hoije, la metereologie porque ye eissencial sabermos l que se passa cul tiempo, para se poder porgramar melhor la bida. La auga porque ye, assi cumo l’ aire, un de ls eilementos eissenciales para se poder bibir.
La barraige de Picuote
Tamien hoije recorrimos a las nuobas tequenologies para mostrar ls sítios mais amportantes para tenermos auga an casa. Nada melhor que porcurá-los ne ls retratos tirados puls satélites i que cada un de bós puode ancuntrar na anternete.
La staçon de tratamento de l Barrocal de l Douro
La auga que ben para Sendin ye tirada de l riu na barraige de Picuote i dalhi bai para la staçon de tratamento que queda por trás de la pousada de l Barrocal de l Douro. Dalhi ben para ls depósitos de Sendin ne l alto de ls fornos. Dalhi bai para todo l lugar de Sendin.
Ls depósitos de Sendin
Para que todo esto funcione bien hai que outelizar muita tequenologie i cada beç mais aperfeiçonada. Tamien para la metereologie se recuorre als satélites, que hora a hora mos ban dando las anformaçones, para melhor saber l tiempo. Ne l retrato a seguir mostro-bos l tiempo que bai a fazer.
De l die 25 al die 2 de Abril
Cumo podeis ber yá ye possible saber l tiempo i la temperatura que bai a fazer ne ls diç dies a seguir. Para esso ye ir al sitio la anternete: http://www.meteobox.com/pt/portugal/braganca/miranda_do_douro/
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
