Hoije yá ye Primabera, mas parece que chegou cun mala cara, l friu parece querer tornar i l aire sopra cun mais fuorça l que bino a dar trabalho als bumbeiros, yá que aparfecírun ls purmeiros fuogos. Mas la Primabera ye siempre un tiempo de spráncia i de renobaçon.
Un fuogo
L autotanque pronto a salir
Tamien ye hoije l die de la árbole i este anho, inda que se téngan arrincado muita binha, tamien se ponírun muita árbole. Sendin yá ten muita almendreira nuoba, que drento de dous ou trés anhos farán cun que las scurçones para ber las almendreiras an flor, pássen a tener Sendin cumo sitio de refréncia.
Un Almendral
La rádio DOURO – FM stubo hoije an direto, toda la manhana a eimitir l sou porgrama zde la sede de la Junta de Freguesie i partecipórun ne l porgrama, l Persidente de la Junta, Norberto Marcos, l persidente de ls Bumbeiros, Ilidio Rodrigues, l respunsáble por l turismo Carlos Ferreira, l persidente de la Copratiba, José Almendra i l diretor de l Centro de música, Mário Correia.
La sede de la junta
Para alhá de la pormoçon de la nuossa tierra, estas einiciatibas son amportantes para ajuntar las anstituiçones mais representatibas de Sendin, para cun la Junta de Freguesie, porgramáren nuobas formas de colaboraçon, an atibidades cunjuntas.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
