Hoije comemora-se l die de l pai al mesmo tiempo que la eigreija comemora l die de San Jesé. Parece que hai percunceitos subre la comemoraçon de l die de seia l que fur, mas la liberdade ye la cousa melhor que hai i inda bien, que se hai Dius, El mos deixou ser libres nun anterferindo na nuossa bida.
San Jesé
Para ls que nun acradítan an Dius ye l die an que lémbran ls sous pais, mas siempre hai quien nun tenga tiempo para para se lembrar de ls pais i tamien quien nien sequiera saba quien ye l pai. La bida ye mui cumplicada i nun bamos nós a cumplicá-la inda mais. Filosofies i teories hai muita, mas quedemos cun esta frase de Amadeu “bibir, deixar bibir i se possible, ajudar a bibir”.
Nas scuolas fazírun postales pals pais
Por la manhana, éran por ende diç horas i dei de caras cun l quadro de l retrato que póngo a seguir. Cuido que ancerra todo l que ye la lembráncia de ls pais i neste géstio, la lembráncia de filhos i amigos, de bezinos ami(g)os i einemi(g)os.
Sien comentairos
Tamien deixo l mil comemtairo para este die:
- Todo l que mos faga pensar i matinar ye buono i haber un die de l pai tamien, porque hai siempre uns poucos que pénsan, relegiosos ou nó, porque an todo hai bien i mal. San Jesé até aceitou la mulher i ajudou a criar un filho deilha, que sabie que nun era sou.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
