Éran las seis i meia de la manhana i l chilrar de las andorinas, que ténen l niu na mi casa, spertórun-me para la nuoba realidade que ye l bolber de ua nuoba bida, bida que todos ls anhos se renuoba. Solo l home teima an nun se dar cuonta que solo ye ua parte de la naturaleza i nó la própia naturaleza ou l duonho deilha.
Las andorinas ne ls nius
Todo se renuoba cada anho i ls que sálen pul mundo a fazer por la bida, buolben. Son las andorinas, son las ceguonhas, son muitos páixaros, que tórnan al sitio onde nacírun. L home inda ten geneticamente l mesmo sentir, mas teima an querer ser çfrente, talbeç un die seia un Dius i se torne eiterno, bencindo la muorte, mas ye parte deste mundo que ten las sues reglas, inda mais bielhas i ciertas que las que el faç.
Las ceguonhas ne l niu
Todo esto fizo-me pensar ne l que serie, se ua beç por anho ls sendineses que stan loinje beníssen a Sendin. Percisariemos de mais turistas? Ye nesto que tenemos que apostar, fazer cun que ls sendineses buolban mais bezes a la sue tierra. Mas ls que acá quedamos, nun podemos fazer cumo ls pardales fázen a las andorinas, que mal las béien chegar, l’acúpan ls nius.
Ls pardales begilantes
L HOIJE quier ser un sitio de ancóntro de todos ls sendineses i tamien un sitio onde cada un ancóntre ua frase, un retrato, ua eideia, que l faga pensar na sue tierra. Todos ls cunseilhos scuitarás, mas solo l tou seguirás, mas para cumparar la nuossa oupenion tenemos que oubir las de ls outros. L HOIJE ye solo un termo de cumparaçon i de anformaçon, mas pensai que l turismo berdadeiro stá nas nuossas manos.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
