Ir a Mondin ye star cun la naturaleza, ye ir a ua de las melhores reserbas naturales de Pertual, mas ua reserba an que l home ye parte de l eco-sistema. Muito se diç i se diç que se faç, mas nun passa de porpaganda i de tentar criar eilusones ou querer ambentar un parque natural, quando l parque yá eisiste i de l qual fázen parte ls sendineses.
Ye guapo i nun apareciu agora
Que parque poderíen fazer meia dúzia de doutores? Ou angenheiros? Se nun eisistissen yá las arribas chenas de nebros i plantas, que ls sendineses perserbórun? I se nun eisistíssen las abes i l riu? Mas ls sendineses (alguns) cuntinan a fazer de las arribas un jardin.
Las colmenas de Chico de las Cabras, por baixo de l Picon
Ua águila por riba de l Picon de l’águila
Hai quien querga que se abandónen las arribas, para deilhas tomáren cuonta por meia dúzia de testones, cumo acunteciu an 1906. Apuis que ls probes i sien tierra, ampeçórun a fazer menumentos nas arribas i a poner oulibeiras an todos ls culagos, lougo tratórun de las debedir i acabou un por quedar cun todo.
Ende stan ls menumientos
Quanto custou a fazer todo esto, mas de pouco apoebeitou als que trabalhórun, porque la miséria de l percípio de l séclo XX de brebe ls fizo deixar todo i íren a ser criados de ls outros, pul mundo. Hoije quieren fazer l mesmo cun la giente. Dízen que esso de la sauidade ye un mal i que l’apego a la nuossa tierra ua falta de cultura ounibersal, cumo se nós nun fazíssemos parte de la naturaleza i cumo ua árbole nun tubíssemos raizes.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
