Yá se bai tornando un hábito de las pessonas íren a passar l fin de sumana pal riu, quier a quemer ua merenda, quier a dar un passeio por las arribas, mas la maiorie bai a praticar çporto, caminando, bendo las abes selbages ou quedando a pescar a la borda de l riu.
Un lúcio
Son muitos ls peixes que se apánhan i cada pescador ten la sue perferéncia, mas ye ua façanha mui grande apanhar un lúcio, un de ls peixes maiores de l riu. Hai-los de mais de ua arroba i cun mais de un metro. Yá eiqui bos dei la nuoba de un de nuobe quilos, mas hoije apanhou-se un de onze.
Martinho i Demingos cun l lúcio
Martinho ye un de ls que gusta de apanhar lúcios i desta beç cunseguiu apanhar un de ls maiores. Agora bai a serbir para ua cena de toda la malta que questuma andar a la pesca. L Hoije nun staba adonde l pescórun i solo fui possible tirar-le l retrato al chegáren a casa.
Mirai bien para la boca de l lúcio
L lúcio ye un peixe carníboro i ye peligroso quando se tira de l riu, mas nun hai nuobas de que tenga atacado a naide. Cumo podeis ber l riu ten muita cousa para dar i puode ser amportante para l turismo, yá que la pesca ye ua atibidade que bale la pena praticar.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
