Fúrun registrados 23 casos de ninos i moços an peligro, ne l cunceilho, nun anho, por la Comisson de Proteçon de Ninos i Moços an Peligro de Miranda de l Douro. Un resultado que puode ser cunsiderado eilebado, tenendo an cunta la pequeinha populaçon de l cunceilho. Inda assi, l Persidente de la Comisson diç que este númaro resulta de l trabalho positibo feito al longo deste ultimo anho.
Ua criança an peligro
“Ls casos stan a ser acumpanhado s i hai meia dúzia deilhes que son más ourgentes” diç António Carçon i frimando inda, que “yá tenemos ua família de acolhimiento ne l cunceilho”. Tamien l fato de l cunceilho mirandés ser un meio pequeinho facelita l trabalho de la Comisson de Proteçon de Ninos i Moços an Peligro. “Cunhecemos-mos todos i por esso sabemos de ls casos”.
La Câmara
Para alhá desso, l Persidente de la Comisson mirandesa adelantrou inda que de brebe bai a ser criada ua linha de telifone para las pessonas podéren dar conhecimento de eibentuales situaçones de crianças an peligro.“Todos ls eilementos de la Comisson ban a tener ua linha móbel para stáren alerta 24H por die” adelantra António Carçon. La Câmara i la Casa de la Criança Mirandesa, de Sendin, son ls percipales apoios de la Comisson.
La Casa de la Criança
Para yá, ls 23 casos stán a ser acumpanhados puls tequenicos desta Comisson. Dou esta nuoba porque ye amporte saberdes que nós tamien mos preacupamos culs nuossos ninos i inda para ls que solo béien l sou umbeligo i dezien mal de l Hoije, por tener screbido que yá hai tamien fame an Sendin, que míren cun atençon al que se passa.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
