La eiducaçon musical tamien se faç nas scuolas de Sendin i esta sumana, la porsora de musica ten lebado ls alunos de las bárias turmas al Centro de Música “SONS DA TERRA”, na rue de la Armita a tenéren cuntato cun la musica tradicional i a daprendéren nuobas realidades.
La porsora i ls alunos quando beníen de l Centro
Yá mais que ua beç tengo falado ne l Centro “SONS DA TERRA” para que las pessonas ban alhá, porque ye ua de las melhores salas de besita de Sendin. Muito ten feito por la musica i la recuolha de todo l que diç respeito a las nuossas tradiçones, mas poucos s’ampórtan.
Ls anstrumentos musicales
Muitos CD’s i libros fúrun yá publicados, cun l’apoio de l Centro i l sou diretor Mário Correia, ten lebado ls nuossos pouliteiros i l nuosso Coro a bárias tierras de Pertual e de l stranjeiro. Son muitas las palhestras que faç i todo esso ye un grande trabalho para que l nome de Sendin seia coincido por todo lado. Que muitos outros sendineses fazíssen eigual.
L CD de “LENGA LENGA”
Coleçon de gueiteiros
Mas este ciclo de besitas, que ls alunos de las scuolas fazírun fui mui amportante i falei cun muito nino, que me dezírun que gustórun i que gostaríen que ls pais fússen tamien alhá, porque ye guapo i ten muito anstrumento antigo i tamien se daprende muito.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
