Por la manhana jogórun ls pequeinhos cun Macedo i a la tarde fui l Sendin - Rebordelo para l Çtrital de Futebol de la AFB i fui tamien ua tarde de cumbíbio cun mais uas quantas pessonas de Rebordelo, Benhais i Chabes, que aporbeitórun l jogo, para beníren a ber las almendreiras na frol i almuorçar an Sendin.
Ls jogadores de parte a parte Bin lutórun
Se esto nun ye pormober l turismo anton yá nun sei l que ye esso. L jogo fui jogado cun agrado por las dues eiquipas, mas l arbitro todo fizo para perjudicar l Sendin. Até parece mal star a falar assi, mas hai cousas que se nun son parécen.
L Rebordelo al ataque
Na purmeira parte l jogo fui eiquelibrado i chegou al anterbalo cun 0-0. La segunda parte todo cuntinaba eigual até que junto a la baliza de l Sendin, la bola ressaltou nun de ls muitos buracos que ten l campo i fui un jogador de l Sendin que metiu la bola na nuossa baliza. L segundo fui nun fuora de jogo que l árbitro nun marcou.
Libre contra l Sendin
L Sendin cuntinou a jogar de eigual para eigual, mas un jogador tubo que salir lesionado i l Sendin tubo que meter l guarda redes suplente, porque nun tenie mais jogadores. Porque meia dúzia de mal eiducados, ne l ultimo jogo chamórun denomes als jogadores, quatro jogadires nun tornórun a Sendin i cun outros trés lesionados, nun habie mais para jogáren.
L Rebordelo tenie melhores jogadores
Sendin ten benido a quedar para trás porque solo se pensa ne ls partidos, ne ls lugares de la câmara i de la junta. Ls partidos son amportantes, mas ténen que se regenerar i abrir a giente que nun faga deilhes un cunstante foco de tráfico de anfluéncias i de mala cumbibéncia. Las próssimas eileiçones locales nunca serán libres se todo cuntinar na mesma.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
