Ua manhana de Demingo bien passada a ber ls nuossos ninos i ls de Macedo, ne l campo de l Grupo Çportibo de Sendin, a jogáren para l campeonato de scuolas de formaçon çportiba. L nuosso Grupo Çportibo, tamien ten la sue scuola de formaçon i partecipa ne ls campeonatos çtritales.
Las dues scuolas – La de Sendin
La de Macedo
La manhana staba de Sol, mais par ecie un die de Primabera i ls pais de ls ninos de l Sendin stában alhá a apoiar ls sous filhos, mas ls pais de ls ninos de l Macedo, tamien benírun i staba bastante giente, l que ben amostrar que tener toda esta atibidade, ye ua cousa buona i amportante.
La giente alhá al fondo
Ls bancos de ls suplentes i treinadores
Todos ls Demingos ye assi, porque l Sendin ten mais que ua eiquipa i inda bénen ls de Miranda a jogar acá. Para ls que solo míran para l que eilhes fázen, ua ou dues bezes por anho, era buono que mirássen para l que l Grupo Çportibo faç, todas las sumanas.
L jogo
Tenie muitos outros retratos para mostrar, mas cuido que estes son sufecientes para las pessonas béren. La giente que aporbeita para benir ne ls fins de sumana a Sendin,ye amportante, mas hai ls que nun quíeren ber i até aporbéitan, para dezir mal, quando nun se ganha, cumo se ne l çporto de formaçon, l mais amportante fusse esso mesmo.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
