Mais un curso de formaçon para moços i moças, an einologie i que dá eiquibaléncia al 12º anho. Son estes cursoa que son amportantes para ls moços i moças que nun acabórun ls studos ne l ansino normal i que agora ténen la posseblidae de studar. La formaçon cun oujetibos ye siempre ua cousa buona.
L grupo de formandos a besitar la Copratiba
Este grupo de moços i moças ténen cumo formadora Márcia Arteiro, que nun de ls trabalhos que fázen cun ls formandos, ls trouxo a la Copratiba de Sendin para béren todo l trabalho que ye feito, zde que se faç la bendímia até al angarrafamento de l bino.
Ua de las moças fizo l relatório de todo
L persidente de la Copratiba acumpanhou toda la bisita i fui splicando todo l que se passaba durante todo l percurso de las ubas, zde que antrában na Copratiba até acabar ne l angarrafamento de l bino yá pronto para ser bendido.
Ls formandos a ber anchir ls garrafones
Durante la besita, para alhá de l percurso de las ubas por las bárias partes de la adega, fui splicado als formandos cumo se fazíen ls bários tipos de bino que tem la Copratiba i ls cuidados a tener cun l sou tratamento. Hai binos de mesa, regionales, VQPRD i DOC. I cada un tem la sue caratelistica.
A béren filtrar l bino
Tamien recebírun ua leçon de cumo tratar de las ubas i quales las melhores castas de la nuossa region. Ye ua pena que la giente nun bai a la Copratiba a fazer ua besita guiada para quedáren a saber que la nuossa adega ye ua cousa amportante, mesmo que haba quien pense l cuntrairo.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
