Un de ls porjetos de ansino de l Ciclo ye la rádio scolar que bai ansinando ls alunos a fazer porgramas de rádio i a saber trabalhar cun un eimissor, para esso ténen yá a funcionar un eimissor de rádio que trasmite para Sendin. Ye an mirandés i ten un nome tamien, ye la rádio – Tele-Guincha.
A porparar la eimisson d’hoije
Para poder tener ls alunos anteressados, ls porgramas ténen ua parte de houmor, que ye la anterpretaçon de testos feitos puls alunos nas aulas de mirandés i subre situaçones que se ban passando na scuola, antre ls alunos ou cun ls porsores.
A fazéren ua grabaçon
Son estas atibidades, outelizando las nuobas tequenologies, que ajúdan ls alunos a gustáren mais de la scuola i a eibitar ls cunflitos i l abandono scolar. Ye berdade que faç cun que ls porsores téngan mais trabalho, mesmo para alhá de l sou trabalho normal, mas ye un trabalho de muito balor para l ansino i ls alunos.
Ls alunos i porsores a fazéren l porgrama de rádio
Agora hai que apoiar la scuola para que las eimissones séian mais regulares i fazer un cumbénio cun ua rádio local, para séren oubidas cada beç mais loinje i por mais pessonas.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
