L HOIJE ten ua mission, que ye para alhá de las nuobas de l que bai acuntecendo, mostrar tamien l que hai de buono na nuossa region. Tenemos falado muito an turismo i bamos mostrando l que puoda ajudar a pormober l turismo de la nuossa tierra i alredores.
L eigreija
Pormenor de la parte de drento de la antrada
Fumos a fazer ua besita a la eigreija de Teixeira, ua de las mais anti(g)as de la tierra de Miranda i cun ua costruçion românica bien demarcada. Para quien besita sendin i ls alredores ye amportante dar a coincer l que hai para besitar, cumo menumentos de cultura, para quien querga ber ou até studar.
1
2
3
Pinturas na parede
Sien ber i cuntatar cun las cousas de cada tierra, pouco se puode saber de la cultura dessa tierra i region. Bemos muito anteletual i doutorando a fazer ls sous trabalhos i a screbir subre cousas que nunca bírun. Fazer un studo por l que outros screbírun ou dízen, inda que le chámen ambestigaçon, nun ye mais que ua cópia.
Esta ye de l tiempo de ls Santos
Cumo se puode dezir ou screbir subre un cierto termo, sien l coincer? Cumo podemos dezir que esta ou aqueilha tierra fala desta ou daqueilha maneira, que este ou aquel nome fui puosto por esta ou aqueilha rezon, sien ber ls sitios i bibir alhá algun tiempo? Yá muita beç stube na eigreija de Teixeira i siempre que bou açlhá beio ua cousa nuoba. Por esso fui alhá para mostrar algo que ye anteressante irdes a ber.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
