L die staba buono i nada melhor que ir a tratar de las huortas, que ye tiempo de poner las patatas, ne ls sítios mais calientes i para tener lougo cedo, bataticas nuobas, para quemer cun toucino frito i regadas cul unto que quedou na sartian. Cumo diç Amadeu, hai que nun deixar perder ls pratos tradicionales.
Un ganado ne l balhe de Atanor
Mas de l que bos bou a screbir hoije, ye de l que me fizo lembrar l ganado que bi. Las canhonas gústan de bibir an tagalhos, porque son mais felizes. Quando solas, segundo ls studos que hai subre eilhas, quédan cun stresse. L tagalho era bien grande i tenien la lana bien cumprida, l friu fizo criar-la para se defendéren de l friu.
Tamien se bíen cordeiricos
Cun la Primabera ampéçan a tener ls purmeiros cordeiricos i pronto chega l tiempo de la squila, para se aporbeitar la lana i para passáren melhor l tiempo caliente que ende ben. L die de la squila ye siempre un die de muito trabalho, mas tamien de quemer un cordeirico, assado ou guisado cun patatas.
Squiladores (retrato anti(g)o )
Pe. Mourinho
Quando fazie parte de l grupo de pouliteiros i danças de ls porsores mirandeses, cantabamos la canti(g)a de ls squiladores:
Vós dizeis que chove, chove,
Eu não vejo cair água;
São lágrimas dos meus olhos
Raparigas da minha alma!....
Cardai, cardicas, cardai….(retrato anti(g)o)
Pe. Mourinho
I tamien la canti(g)a de ls cardadores:
Cardai, cardicas, cardai,
La lana pa ls cobertores;
Que las pulgas stan prenhadas,
Ban a parir cardadores….
Cumo sabeis, apuis de squiladas las canhonas, labában la lana i cardában-la para la filar i fazéren las mantas, cobertores, meias, pardo….
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
