Hoije fui die de daprender a fazer l folar, nas scuolas de l purmeiro ciclo de Sendin. Porsores, ampregadas i alunos, todos partecipórun nun die de scuola, cun ua aula prática que ampeçou a la hora de abrir la scuola i solo acabou a la hora de ancerrar.
Ls pordutos para l folar
Ls alunos a béren
Todos ls que podírun, traírun de casa pordutos para l folar: la farina, l’azeite, la manteiga, la chicha, ls uobos, l’auga habie-la na scuola. Tamien traírun las formas, ls barrenhones porque nun habie masseira i todos ls outros artimanhos neçairos.
Ua forma untada cun manteiga
Ls uobos
La chicha
Purmeiro, las ampergadas i las porsoras ansinórun cumo se fazie, partindo ls uobos caseiros,amassando i batendo la massa, cotando la chicha i ponendo-la nas camadas de massa, que apuis de star pronta, era puosta nas formas.
Las ampregadas a trabalhar
I las porsoras tamien
Nun bou a splicar cumo todo se faç, porque l que eiqui amporta ye dar la nuoba. A seguir al trabalho de las ampergadas i porsoras, ls alunos fazírun tamien un folar. Quando todo quedou pronto, Adília lebou todo para l sou forno onde quedórun a cozer durante l tiempo de l’almuorço i até las trés de la tarde.
Ls alunos a bater la massa
Ls folares ne l forno
Yá nua mesa de la scuola
Apuis de prontos, ajuntórun todos ls alunos, ampergadas i porsores i tratórun de ls comer. Fui un die çfrente i que nunca mais l ban a squecer ls garotos que andórun este anho na scuola de Sendin.
Ne l sitio de ls retratos stan todos ls retratos que tirei durante l die.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
