Onte fui la Assamblé giral de la Copratiba, para aprobaçon de l relatório i cuontas de la direçon. La Assamblé era persidida por l Drº. Vitor Bertolo i secretariada por José Maria Gonçalves i pelo porsor Virgilio Pires. La mesa apersentou ls decumentos, que fúrun çtribuidos a todos ls associados.
La mesa
Por parte de la direçon, splicou las cuontas, l tesoureiro de la direçon, Drº José Peres Marcos, falando de todas las cuntas de l atibo i de l passibo i splicou inda l que fui la atibidade de la Copratiba durante l anho de 2008 i fizo la cumparáncia cun ls anhos anteriores. La situaçon ten benido a melhorar an todos ls setores i las cuntas de l anho acabórun cun un ganho de 81 607,39 euros.
La Assamblé
Quando la crise ye un porblema por todo lado, la Copratiba ten benido a crecer, mesmo neste anho de crise, tenendo sido libertados ls diretores de direçones anti(g)as, que inda tenien letras assinadas, de todas las sues respunsablidades culs bancos, yá que fui pago todo l que inda se debie al BCP – 300 000 (trezientos mil euros).
Ls sócios stában atentos
L relatorio i cuntas fúrun aporbados por ounanimidade. Inda houbo ua parte de sclarecimentos i la direçon, por l tesoureiro i por l persidente Drº José Almendra, dou la respuosta a todo, sendo de registrar que neste anho, la Copratiba apersentou dous porjetos para recumberson de nuobas binhas cun mais de 70 há.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
