La quemunidade de sendineses an Lisboua ye mui grande i l númaro de familhias de ourige sendinese fazie ua nuoba bila se stubíssen todos juntos. Nun ademira puis que muitos sendineses ánden l camino de Sendin a Lisboua i de alhá para cá.
Un grupo de sendineses ne l stádio de l Benfica
Aporbeitando l fin se semana maior, por cousa de 1º de Maio, un grupo de sendineses fúrun a bejitar ls filhos i cumo nun podie deixar de acuntecer, la bejita al stádio de l Benfica era einebitable. Quier la giente querga quier nun querga, l futebol i l Benfica inda son refréncias para muita giente.
Luís Mateus i Andreia junto de la státua de Eusébio
L sala de quemunicaçon de l stádio ye siempre un sitio adonde las pessonas, que bejítan l stádio, ban a sentar-se i a fazer de cuonta que stán a dar ua cunfréncia, cumo fázen ls treinadores, ne l fin de l jogo. L banco de suplentes ye outro sitio adonde gústan de se assentar, fui l que fizo este grupo de sendineses.
Cisnando parece un treinador, mas Andreia ye que dou la cunfréncia
Estes nun jógan, stan de suplentes
La bida ye mesmo assi, hai que la bibir i cun alegrie, yá que l passado yá fui i l feturo nun sabemos l que será. Bibir a scunjurar l passado ou a querer fazer un feturo a la nuossa maneira, cumo se fussemos diuses, nun ye buono nin sério.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
