Fúrun muitos ls mirandeses que cumbatírun nas anti(g)as quelónias i alguns morrírun alhá, mas cumo todos sabemos, ye nas alturas de grandes deficuldades, que ls homes mais se únen i antre eilhes se crían mais amizades. Muitos yá dezenas de anhos que nun se bíen i fui buono fazer este cumbibio.
Fúrun recebidos ne l salon nobre de la câmara
L cumbibio tubo cumo puonto mais alto la missa por ls mirandeses que morrírun nas guerras de Angola, Guiné i Moçambique. Fui un momiento de eimoçon, quando ls sous nomes fúrun lidos, na sé, durante la missa. Ami(g)os i camaradas prestórun-le sentida houmenage i an todos quedou un sentimento – que nunca mais seia perciso fazer guerra.
L momiento an que éran lidos ls nomes
A seguir a la missa houbo un almuorço ne l salon multi-usos de Miranda de l Douro, serbido por Eisidro de Sendin. Fui durante l almuorço que se fúrun ajuntando por mesas ls que stubírun juntos na guerra i muitas fúrun las lembráncias de l que passórun i de ls camaradas que yá nun stan antre nós.
Alguns de ls persentes
Para l anho haberá outro cumbíbio, mas stensibo a las mulhieres. Dou-bos mais esta ambora para ls que nun stubírun por nun saber, púodan star para l anho.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
