Ne l “Centro de Arte Contemporânea Graça Morais”, an Bergáncia, einougurou-se la “Exposição Arte Partelhada Millennium bcp”, que ye ua sposiçon de pintura de ls percipales pintores pertueses cumo – José Malhoa, Columbano Bordalo Pinheiro, Amadeu de Souza-Cardoso, Maria Helena Vieira da Silva, Armanda Passos, Graça Morais…
La abertura de la Sposiçon
Son eibentos cumo este que tráen a las nuossas tierras l que solo ls museus púoden amostrar, mas que assi, tórnan la arte acessible a toda la giente que doutro modo nun tenie la posseblidade de a eilha tener acesso. La sposiçon stá alhá até l die 25 de Junio.
Bejitando la sposiçon
Ua pintura de Graça Morais
Fui anteressante ber muito sendinés na einouguraçon i podermos ancuntrar cumo respunsáble por toda la coleçon de arte al drº. Fernando Nogueira, que fui siempre ami(g)o de Sendin i gustou de ber-nos alhá. L bice-persidente de l BCP, drº. Armando Vara, amigo personal nuosso i que fui l ampulsionador de l quartel de ls Bumbeiros de Sendin, tamien gustou de ber alhá tanto sendinés.
Sendineses na sposiçon
Ne l fin las pouliteiras de Valcerto dórun spetáclo
L HOIJE stá siempre onde ye perciso que Sendin steia persente, mas neste causo inda mais, dadas las amizades cun ls percipales respunsábles por este eibento. Até la pintora Graça Morais gustou de ancuntrar la sue cumpanheira de studos Marília Almendra a quien daba ls purmeiros zeinhos que fazie.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
