Zde pequeinho que oubo amentar na fiesta de la Trindade cumo ua de las cousas mais amportantes de l Praino. Para la mocidade de Sendin, fui siempre ua fiesta porparada cun todo l cuidado, porque ye ua fiesta cun muitas tradiçones i a la qual ban las mocidades de todas las aldés de l Sul de l cunceilho.
La capielha de la Trindade
Yá muito se ten screbido subre la ourige de la fiesta i de las tradiçones, l HOIJE solo bos quiero dar mais ua buona ambora relacionada cun la fiesta. Cumo sabe la maiorie de ls que fúrun yá a la fiesta, an outros anhos, siempre fui defícel ancuntrar auga ou lebar ls ninos a fazer las necidades.
La taberna de la comisson de fiestas
Purmeiro la Comisson de fiestas fizo la taberna i ancanou l’auga até al largo de la capielha, fui ua de las buonas cousas que se fazírun, mas agora cumpletou-se la obra cun la cunstrucion de las casas de banho, para homes i mulhieres.
Las casas de banho
Para muitos puode parecer ua cousa menos amportante, porque dízen que la giente toda la bida fui a campo. Mas las malinas i las pessonas que mos bejítan i que nun stán aquestumbradas, tornórun las casas de banho, cumo ua necidade.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
