L Centro de Música Tradicional Sonidos de la Tierra (CMTST), situado an Sendin, ne l cunceilho de Miranda de l Douro, comemora dieç anhos de eisisténcia. Esta refréncia na region strasmuntana ten a sou cargo l trabalho de reculhir l património eimaterial, para eibitar que muitos toques, cançones, músicas ó “lhonas” se pérdan para siempre.
L sitio de la musica
Al longo desta redadeira década yá fúrun reculhidas cerca de 6 500 horas de registros que ban zde ls cantos relegiosos, sonoridades de ls bielhos gaiteiros, toques de campanas, cancioneiros regional i relegioso, antre outros.
Coleçon de anstrumentos musicales
A par de l registro fonográfico de l património musical i etnográfico de l Praino Mirandés, hai tamien ls arquibos fotográficos. Trata-se dun acerbo que cunta cun mais de 28 mil retratos que retrátan einúmeros momentos de ls usos i questumes de las quemunidades de la region Norte i Centro de Pertual.
La matraca
Para alhá destes registros, que serán outelizados para mimória fetura, l CMTST çpone de mais de 3 500 libros specializados an bárias temáticas de la música tradicional pertuesa. Inda assi, hai outros eilemientos de l spólio que ten de se tener an cunta, cumo ls seis mil fonogramas (CD, DBD i K7) que ténen benido a ser depositados ne l arquibo de l CMTST por amportantes etnomusicólogos nacionales i strangeiros.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão-
