La biodibersidade ye ua necidade, nó un luxo. Ne ls últimos anhos, l zaparecimento de spécies i de sitios naturales, cunsequéncia de la atibidade houmana, ten-se bisto a ua belocidade sin precedentes. Comemora-se hoije l die de la biodibersidade, por esso bos falo neilha i porque tenemos un de ls paraísos naturales – las arribas de l Douro-.
Las arribas
Agricultores i criadores depénden de la dibersidade genética de las culturas i de l ganado, para oumentáren la porduçon i para ser possible respunder a las alteraçones de las cundiçones ambientales, por esso hai que la defender. Ne l Praino inda se defende l’ambiente.
Un ganado de l Praino
La biodibersidade nun dá solo benefícios diretos, mas tamien mos garante un sistema de suporte de la bida. Eilha ye eisigida para la reciclaige de ls eilemientos eissenciales, cumo l carbono, l oucigénio i l azoto. Ye eigualmente respunsable por cuntrolar la poluiçon, porteger ls lençoles d’auga i cumbatir la eiroson de las tierras.
Ls patos inda porqui fázen ls nius
La medecina tradicional, que depende de spécies salbaiges ó cultibadas, custitui la base de ls cuidados médicos purmários para mais de 80% de las pessonas que bíben an países an zambolbimento, mesmo ne ls países mais zambolbidos, la medecina tradicional stá a cunsquistar cada beç mais pessonas.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
