Hoije fui mais un die de atibidades de la AEPGA i de la ADCA de Atanor, cun l’apoio de la Junta de freguesie de Atanor i de la Câmara Munecipal de Miranda. Las atibidades ampeçórun onte cun un arraial popular i musica tradicional.
Ls porparatibos para la caminada
L grupo de ls mais moços
Pur la manhana houbo, para animar la giente i para traer tamien algo de çfrente para la giente de Atanor i alredores, demostraçones de biaiges de parapentes a motor, an que partecipórun bários moços i moças, nua biaige puls aires a béren l Praino de un modo que nunca l habien bisto.
L grupo adonde fumos nós
Apuis fúrun las atibidades culs burros. Ls grupos de 5 i cada grupo cun un burro ou burra, fizo ua caminada a la porcura de l tesouro, que nun era mais que ua caminada ourientada para bejitar bários sítios adonde ancuntraba un lugar stórico i alhi recebie ua leçon de stória. Un berdadeiro tesouro que muitos nunca squecerán.
L sitio de la huorta tradecional
L sitio adonde se fazíen ls bailes
Un de ls sítios era nas curraladas adonde se fazíen ls bailes al toque de anstrumentos tradicionales, al percipio, i apuis al toque de la grafonola. Nesse sitio, durante la caminada, ajuntában-se dous grupos a la beç i tenien que daprender un baile al toque de la gaita de foles.
Puls caminos de la ribeira
La paisaige era guapa i l die staba buono para caminar, homes i mulhieres, moços i moças, nuobos i bielhos aperciában l’ancanto de l Praino, a seguir fui l’almuorço i por la tarde ls jogos tradicionales. Zde agora i até Outubre, todos ls fins de semana hai atibidades por todo l Praino. L prócimo ye Miranda i Aldé Nuoba, apuis la Trindade.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
