Talbeç l nome nun seia l mais cierto yá que zde l tiempo de ls romanos que nun haberá florestas porqui i la giente nun usarie esta palabra, talbeç dezisse monte, mas hoije la florestaçon ye ua cousa cun que cada beç mais mos bamos anfarinando i todo mundo fala an floresta, mesmo para ua terrica de meia dúzia de ciprestes ou cereijeiras brabas.
Cereijeiras brabas cun mais de 15 anhos(floresta?)
Mirai bien pal retrato ( hoije hai outra mentalidade)
Lembrou-se-me hoije de falar nesto porque ouserbei l que se passa por todo l termo cun las ditas florestas. Pertual tenie que fazer algo por cousa de gases de stufa i fui oubrigado a apoiar la florestaçon, pena que la cousa habisse sido feita, mais para recebir l denheiro i amostrar que se fazie algo, que para fazer un trabalho sério pal feturo.
Un sobreiro centenairo
La plantaçon de árboles de outras regiones nun fui l mais acertado i plantar-las uas an riba de las uotras inda pior. Hoije cun las almendreiras sta-se a fazer algo aparecido, cun la giente a pensar ne l denheiro que ban a recebir i nó nas almendreiras i muito menos ne ls fruitos.
Ua nuoba plantaçon de binha deste anho, bista de baixo
Bista de riba ( Bei-se Penilha )
Outra nuoba binha deste anho (no meio de las dues, mirai le retrato de riba)
Cuido que ye tiempo de la giente i percipalmente ls que ténen mais coincimentos pensáren ne l que ye melhor para l nuosso termo. Les mais nuobos i ls que stúdan nas ounersidades ténen la oubri(g)açon de defender l nuosso património florestal i agricola.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
