Mais un anho i l cumbibio de sendineses an Lisboua parece que cuntina de la melhor maneira yá que este anho stubírun 140 pessonas na cena. Este anho tubírun, cumo nun podie deixar de ser, la partecipaçon de un grupo de musica tradicional mirandesa de que fazie parte ua mulher a tocar la gaita de foles.
Ls sendineses íban-se ajuntando
L grupo de musica tradicional
Este fui l segundo anho i ls mardomos deste anho (Elisa Mourinho, Armanda Santos i Pedro Bárbolo) quejírun houmenagear ls purmeiros mardomos de l cumbibio, ponendo-le ua corona de louros na cabeça, fui angraciado i cumo mandórun fazer camisolas cun l’amblema de la Bila , fui mais un sfregante de alegrie.
Ls mardomos deste anho
De quemer i buber nun faltou
Las mesas stában bien cumpuostas i nun faltou de quemer nin de buber, mas l que l HOIJE puode dezier, ye que ls moços i moças sendinesas angalanában tan bien ls sentalhos a la buolta de las mesas, que até l quemer sabie melhor cun cumpanhas tan guapas.
Mirai para esta mesa
I esta?
Mas ls menos moços tamien stában todos bien guapos i cuntentos, aporbeitando l cumbibio para faláren de sendin i aperciáren la sposiçon de l ciclo de l pan, zde l amanho de la tierra al tirar de la fogaça de l forno. Fui ua buona einiciatiba para amostrar que la nuossa cultura stá tamien persente.
La apersentaçon de ls mardomos para l anho que ben i Crisinha cun la corona de louros
Para l anho ls mardomos son cumo podeis ber pul retrato (Ema Ginjo, Vítor Aleixo i Marisa Salgado). Que por todos ls lados adonde hai sendineses, se fágan cumbibios antre todos, para que Sendin seia ua marca de refréncia i de ounion – l HOIJE será l buosso mensageiro anquanto bós quejirdes i nós podirmos -.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
