Ls sendineses de todo l mundo i por ls bários sítios por adonde se ancóntran, ban fazendo cumbibios para lembrar la sue querida tierra i podéren falar tamien de las lembráncias de la bida i de las familhias i amigos, yá que durante l anho, l trabalho i las preacupaçones nun le déixan tiempo para se béren mais amenudo.
Fui assi que ampeçou l cumbibio
La nuoba de l cumbibio de l Porto nun la deia lougo, porque ls retratos demorórun a chegar i apuis, porque eilha fui dada ne l SAL, ne l sitio de l turismo, mas cumo muita giente me ten pedido para la poner ne l HOIJE, yá que muita giente ye eiqui que ben mais bezes, dou-bos-la hoije, para ls stan loinje béren tamien l cumbibio de l Porto.
La musica tradecional nun faltou
Ne l Porto ye adonde hai mais moços i moças de Sendin i anton ls moços son de ls mais animados, rezon porque fázen siempre un jogo de bola. Este cumbibio ten yá 17 anhos de eisinténcia i cada beç ye mais animado. L cumbibio yá ye ua tradiçon i nel partecípan muitas familhias cumpletas i cunta siempre cun sendineses que bíben an Sendin, mas que bán d’aperpósito a este cumbibio.
La mesa de ls mardomos
L quemer fui até fartar
Cumo hai muito moço i moça, las mesas son siempre berdadeiros ramalhetes de flores. Gostarie de bos amostrar eiqui todas las mesas, mas l melhor ye irdes al sitio de l turismo, que alhá teneis ls retratos todos.
Nun son bien guapos
Siempre que haba ua nuoba por algua parte de l mundo i que la quergades dar a coincer, mandai para l mail ze.almendra@hotmail.com .
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
