Acabei la mie redadeira crónica a falar de fachos i alumbreiras, amostrando que esse património inda quedou bibo an muito chamadeiro que hai por ende. Esso fizo-me lembrar ua çcriçon stroudinária de la tragédia «Agamenon», de Ésquilo (525-456 a.c.), cunsiderado l pai de la tragédia griega tal cumo nós la coincemos hoije. Ye aqueilha parte adonde se cunta cumo chegórun tan debrebe a la Grécia las amboras de la fin de la Guerra de Troia. Corifeu, ua de las figuras daquel quelóquio, pregunta-le a Clitemnestra, mulhier de Agamenon, l rei que chefiaba las tropas griegas que circórun a Troia: «I que mensageiro poderie traier tan debrebe esta nobidade?». Fui assi la repuosta de Clitemnestra, dun menudo rigoroso que mos premite seguir la luç de las fogueiras a passar de cabeço an cabeço, de ilha an ilha até chegar al çtino:
«Heifesto que lançou de l Ida un reluziente relampo. I, cumo correios de fuogo, cada facho trasmitiu-le a outro facho la sue mensaige. Esta chegou purmeiro a Lemnos, a la peinha de Hermes; fui apuis la beç de l picon de Atos, cunsagrado a Zeus, recebir an treceiro lugar la grande luç benida de la ilha; puls aires, arrepassando l lombo de l mar, la fuorça de la luç biajante camina cuntenta, fachuqueiro de pinho que trasmite, cumo un sol, l sou brilho de raios de ouro a las carapotas de l Macisto. L monte nun pára: sin se deixar bencir pul suonho, nun çcuida l sou deber de mensageiro i, de loinge, porriba las corrientes de l Ouripo, la luç de l fachuqueiro anúncia la chegada als begias de l Messápio. Estes dan lougo la repuosta de la chama, botando fuogo a un braçado de urç yá rebielha, i la nobidade sigue al palantre. Sin seinhas de fraqueza, l fachuco ardiente arrepassa anton dun brinco, a modo de luna luziente, la preinada de l Asopo a caras a la peinha de l Cliteron, adonde sperta la cuntinaçon de l fuogo mensageiro. Sin çpreziar esta luç benida de loinge, la guarda acende outra mais grande que las purmeiras. I la luç atirou-se porriba l lago de ls uolhos de Górgona i, chegando a la muntanha adonde retóuçan cabras, anduç ls begias a oubedecer a las ordes de l fuogo. Estes, acendendo ua fogueira dun bruar que mete miedo, ambían ua larga ala de chama que, reluzindo, arrepassa l piquete que stá porriba l streito de Sarónico, chama que s’atira, que chega al fin al piquete Aracneio, la bela mais acerca de la nuossa cidade. I ende cai subre este telhado de ls atridas la luç que busca ls sous antrepassados ne l fuogo de l Ida.» (Traduçon para mirandés feita zde ÉSQUILO, Oresteia. Agamémnon, Coéforas, Euménides, Introdução, tradução – para pertués - do grego e notas de Manuel de Oliveira Pulquério, Edições 70, Lisboa, 1992, pp. 37-38).
La citaçon si fui larga, mas ye esta la melhor çcriçon que conheço de cumo funcionában ls fachos i alumbreiras, anque esso tubira sido hai mais de dous mil i quenhientos anhos. Inda hai pouco mais de duzientos anhos ls fachos fúrun ousados antre nós por bias de las ambasiones francesas (1809), nua altura an que yá nun faltaba muito para que Bell ambentara l telfone. Mas hai decumientos de ls ampeços de Pertual (1187) que yá fálan neilhes eiqui nas nuossas tierras. Esso quier dezir que stamos delantre dua cultura de quemunicaçon que durou cientos ou miles de anhos. Ende stan ls antrepassados de ls modernos meios de quemunicaçon, cumo l telfone i outras marabilhas aparecidas.
Ls fachos i alumbreiras inda ténen l sou nome spalhado puls termos, mas squecimos l que esso querie dezir. I quien diç fachos i alumbreiras poderie dezir muitas outras cousas. Tenemos ua cierta tendéncia a squecer l passado, percipalmente l de la nuossa giente. Se esse passado quedar agarrado a piedras algo defrentes, cumo inda hai dies mais ua beç acunteciu an Picuote cun un «berron» de piedra que alhá achórun, inda somos capazes de le dar algue amportança porque esso fui notícia nun jornal, nada mais que lume de bides. Mas se quedar agarrado solo a nomes ou a cousas que nun se mos sbárran ne ls uolhos, yá mos squecemos i nun le damos la sue berdadeira amportança. Inda hai pouco tiempo se fizo l que le chamórun la «rota de ls castros», i cuido que esso fui ua buona cousa. La pena ye que muita beç einiciatibas cumo essa déian para scunder l’amportança que nun se dá a outras cousas que ténen que ber cul nuosso passado cumo pobo. I, yá que stamos a falar an fachos i alumbreiras, cuido que inda a naide se le lembrou de fazer la rota de ls fachos i alumbreiras, que podie até dar para séren acesos de tiempos a tiempos, ligando cabeços i tierras que siempre stubírun ligados, nin que nun fura por mais nada. Daba, assi, para fazer ua cadena de luç antre tierras que stan de cuostas uas pa las outras i que algo habie de alumbrar, que mais nun fura l passado que mos fizo, ls miedos por que passou la nuossa giente, ls einemigos dun cierto tiempo que deixórun de l ser.
Al modo que bamos coincendo la stória i antendendo cumo las cousas demúdan, esso tamien son seinhas de sprança que bamos sembrando. I nun falo solo de la stória giral, mas de la stória de cada sítio, de cada region, la stória local. Debie de ser oubrigatório que essa stória fura ansinada nas scuolas, a acumpanhar la stória nacional i mundial. Esso serie l modo de amostrar que la stória ye ua cousa biba, que deixou muita pisagada a la nuossa puorta i que nun ye solo ua cousa de libros, ua cousa que parece nada tener a ber cun nós. Por eisemplo, fala-se de la guerra de l’andependéncia i algua beç mos lembramos de dezir que D. Juan I stubo an Trás de ls Montes i que D. Nuno Álvares Pereira bieno a la capielha de Nuossa Senhora de l Azinhoso a rezar, nua altura an que andaba a luitar pula andependéncia de Pertual? Fala-se de la Anquesiçon, mas ye mui ralo amentar-se ne l sangre que arramou a la nuossa puorta. I la Guerra de la Restouraçon, an 1640, fala-se de todo l que se passou antre nós i de cumo nessa altura inda ls fachos zampenhórun un amportante papel cumo abiso contra l einemigo? Yá nin falo de la Guerra de ls Siete Anhos, tamien coincida cumo Guerra de l Mirandun, an que ls pobos de muitas bilas i aldés quedórun sin nada, i castielhos cumo l de Miranda quedórun un zbarrulho? I poderie cuntinar por páiginas i páiginas.
Cuido que seguir l ansino de la stória cul modo cumo eilha se manifestou nas nuossas tierras ye ua maneira de ligar l ansino de la stória a la bida, torná-la mais anteressante pa ls studantes i daprender ua cultura an que quedamos a saber que, anque pareça l cuntrairo, nun stamos fuora de la stória i, por mais pequeinhos, tamien somos atores dessa stória. A las bezes cuidamos que solo ye stória l que se passou hai muitos anhos, ne l tiempo de ls romanos ou inda antes deilhes, squecendo-mos de la stória que queda mais acerca de nós.
Ambestir na stória local i regional ye ambestir na cuncéncia cidadana de todos nós, ye meter-mos andrento de l mundo, ye antender porque rezon tanta beç fumos i somos çpreziados puls gobernos centrales. Un cierto sfuorço que ten benido a ser feito nesse sentido ye ua cousa buona, mas inda hai muita lana que tenhir i, subretodo, cuido que esso inda nun passou pa las scuolas que tanta beç stan de cuostas pa l que se passa al redror deilhas.
Hai pobos que al largo de la stória fúrun ganhando créditos i fazendo díbedas. Nunca ye tarde para que essas díbedas séian pagas por quien ten que las pagar. Mas l mais amportante que puode benir de achegar la stória a la nuossa puorta i traié-la para acerca de ls nuossos tiempos, ye ganhar la cuncéncia de que nós mesmos somos atores de la stória, que ls nuossos feitos de hoije ténen cunsequéncias, mesmo quando cuidamos que esso nun anteressa para nada.
Uas bezes son de fuogo las mensaiges que la stória mos trai, outras son de sangre, outras de abandono, outras de ladronaige, outras son haroicas ou serenas cumo ua selombra de berano. Hai que las coincer bien, nó para rucecitar l passado, mas para saber quien somos i cumo cheguemos adonde cheguemos. Talbeç assi mos puodamos librar mais facelmente de ciertas mintiras que mos cuontan subre nós mesmos. Essa será, stou cierto, ua de las maiores houmenaiges que le podemos prestar als que bibírun antes de nós i mos deixórun l mundo que tenemos. Esse será tamien l camino mais cierto para assentar l nuosso feturo an aliçaces mais seguros.
11 de Júlio de 2005
Amadeu Ferreira
