Hai palabras que oubimos muita beç i, afuora algues cuçquinhas por nun sonáren bien al mirandés, nun le damos amportança nanhue. La palabra ‘leba’ ye ua deilhas anquanto nun birmos cun atento l que quier dezir i, subretodo, porque rezon anda ua palabra que sona a pertuesa a fazer pul meio de las palabras mirandesas. I esta palabra sona a pertuesa porque la palabra mirandesa que ampareilha cun eilha habie de ser ‘lieba’ ou ‘lhieba’, mas la berdade ye que nun conheço estas palabras a nun ser cumo forma de l berbo ‘lebar / lhebar’. Esso quier dezir ua cousa mui simples: nun s’ousando an mirandés las palabras ‘lieba’ ou ‘lhieba’, cumo sustantibos, mas solo la palabra ‘leba’, que bieno de l pertués ‘leva’, ende há-de haber ua rezon mui fuorte para que assi houbira sido, quier dezir, há-de haber ou haber habido algo que era assi chamado i que ampressionou las pessonas al punto de passar pa l mirandés tal i qual, sien ser recebida cunsante las regras desta léngua.
Mirando pa l sentido que la palabra ‘leba’ ten an mirandés, bemos que eilha ye ousada para dar un sentido superlatibo ou abseluto al resultado dua acion, seia esse resultado buono ou malo. Assi, cun un sentido positibo puode-se dezir: «anton, fazistes buona feira? – ai, mui bien, aqueilho fui ua leba, que nistante se bendiu todo». Mas tamien se diç, agora cun un sentido negatibo: «chobiu tanto que bieno ua ribeirada que lebou todo, fui ua leba mui grande, un delúbio». Tamien se puode ousar cul mesmo sentido, mas yá cumo quien roga ua praga: «nun benirá ua leba que los liebe a todos?!». Cuido que destas spressones s’antende bien l sentido superlatibo, abseluto, de agarrar todo, que ben de l uso de la palabra ‘leba’.
Se furmos als dicionairos bemos que ‘leva’ ye quemun al pertués i al castelhano i inda se usa muito nas dues lénguas. An pertués ten bários sentidos, sendo mais quemun l de ‘grupo de pessonas que ye lebado para algun lugar’, muita beç referido a suldados ou presos. Assi, i stou a falar de tendéncia, bemos que ne l pertués la palabra refire-se subretodo a cousas que son lebadas, mas ne l mirandés ten mais a ber cula acion de lebar i l sou resultado mui fuorte, sendo tamien mais neste l sentido que la palabra ye ousada an castelhano.
Para sabermos l que ye ua ‘leva’ tenemos que arrecular muito ne l tiempo, ende pa l seclo XV ou, al menos, até seclo XVI i tener an cuonta la política de ajuntar ls presos de todo l paíç an Lisboua, na cadena de l Limoeiro, para íren a serbir nas galeras ou para íren an degredo pa la África, Índia ou Brasil. La cousa passaba-se mais ou menos assi: agarrában-se ls presos de la cadena de cada comarca i, bien guardados i atados cun corrientes, éran lebados de comarca an comarca até chegáren a Lisboua i ende séren ancerrados na cadena de l Limoeiro até séren ambiados pa l sou çtino final nas galeras ou ne l degredo, que fui un de ls modos de ls reis pertueses quelonizáren l que staba çcubierto. Al modo que la leba se iba achegando a Lisboua, l númaro de presos iba angordando, siempre angordando. Nun ye defícele manginar aqueilhes presos todos, cun cadenas ne ls pies i a la cintura, cun suldados bien armados a guardá-los, arrastrando-se por esses caminos i passando pulas tierras i pul termo a la bista de todo mundo, çfamiados, cansados i chenos de parchacas. Si habie de ser ua percion bien apressionante, que nun se le iba a squecer a quien la bisse. A la bista dua percion destas antende-se bien que la palabra ‘leba’ passara tal i qual pa l mirandés i que houbira ganhado aquel sentido superlatibo, abseluto, de que falemos arriba. Bendo bien, cumo era la comarca que quedaba mais loinge de Lisboa, muitas dessas lebas habien de ampeçar eiqui pula comarca de Miranda.
Cul tiempo, la leba passou tamien a ser de pessonas que éran agarradas, mais ou menos a la fuorça, pa l serbício melitar. Sabemos que an 1632 houbo un recrutamiento pa l Brasil, oudenado pul rei na comarca de Miranda. I ende cada un achaba modo de se scapar, ne ls mais de ls casos pa la Spanha. Até Lisboua la biage nun era fácele, culs caminos chenos de ladrones de strada i cada un a ber se se scapaba de la leba cun ajudas de amigos i parientes que le íban salindo al camino. Cúntan-se bários casos an que se scapórun ls presos de la leba. Mas, tenendo an cuonta la sue ourige, la leba quedou siempre liada al trabalho nas galeras, barcos de adonde quaije nun se salie cun bida, a que cada un buscaba modo de scapar. Tamien ende haberá nacido l sentido de la palabra ‘galeras’ an mirandés, palabra que solo se usa ne l plural i ten l mesmo sentido superlatibo de ‘leba’, i stá subretodo relacionada cun fugir a toda la priessa, cun correr mui debrebe, naqueilha spresson ‘corrie que lo lebaba galeras’, que talbeç benga de ‘corrie que lo lebában pa las galeras’. Se mirarmos bien bien, naqueilha spresson mirandesa la palabra galeras ten l mesmo sentido de ‘mostro’, de ‘papon’, de ‘miedo’ que lieba las pessonas i eilhas ténen de fugir del para nun se deixáren agarrar. Mas tamien hai ua outra spresson an que la palabra ‘galeras’ dá a ua frase l sentido superlatibo, de grande quantidade, que diç, cumo tal, ‘éran percisas mais cousas que mil galeras’.
L’antrada de las palabras ‘leba’ i ‘galeras’ ne l mirandés, cul sentido tan special que arriba apuntei, solo puode querer dezir que las pessonas deiqui spurmentórun na piel l que esso era. Há de haber decumientos que fálen desso, cumo l de la leba pa l Brasil an 1632. Mas inda que nun houbira decumientos, bundarien las palabras leba i galeras. Anque las pessonas yá nun se lémbren de l que esso era, pus haberan antrado ne l mirandés ende puls seclos XV ou XVI, l sentido que quedou agarrado a eilhas nun deixa lugar a dúbedas de que cúntan cuontas berdadeiras de momientos trágicos i defíceles. La mimória de las pessonas ye grande, mas acaba por se apagar. Yá la mimória de las palabras nunca se apaga anquanto haba ua boca pa las dezir i un pobo pa las guardar. Deixar perder palabras cumo ‘leba’ i cumo ‘galeras’ ye deixar perder cachos amportantes dua stória que solo eilhas sáben cuntar, dua stória que tamien ye ardança nuossa i de que aqueilhas palabras quedórun cumo menumiento a zafiar l tiempo i tamien a zafiar la nuossa capacidade pa las guardar cul respeito que eilhas merécen.
12 de Janeiro de 2006
Amadeu Ferreira
Abiso:
Este testo, cunsante las regras de la Cumbençon Ourtográfica de la Léngua Mirandesa i de la sue Purmeira Adenda, stá solo screbido cun L- an percípio de palabra, a la moda de l mirandés de Sendin.
