Qualquiera die de l més de Dezembre, que inda nun stá treminado, bai a ser publicado un nuobo libro de las abinturas de Asterix, traduzido an mirandés. Essa abintura chama-se, an francés, «Le Grand Fossé» i fui l purmeiro screbido por Albert Uderzo el solico, apuis la muorte de René Goscigny. La scuolha de la obra pertenciu-le a l’eiditora ASA i nó als tradutores.
L’eiquipa de traduçon, desta beç, fui custituída por mi i por José Pedro Cardona Ferreira, cuntando cula grande ajuda de Domingos Raposo, de Duarte Martins i de António Santos. Anque nun tenga feito parte de l’eiquipa de traduçon, tamien fúrun recebidas amportantes ajudas de Carlos Ferreira, yá que el fui l cunsultor de l’ eiditora francesa que ten ls dreitos de l libro, para abaluar la traduçon feita para mirandés.
Nesta abintura de Asterix fala-se dua aldé debedida al meio antre dous xefes, amostrando-se cumo la debison nun lieba a lado nanhun, l’aldé queda andeble delantre de ls sous einemigos, ls romanos, i gasta todas las sues fuorças an antrequidéncias que nada ténen que ber culs antresses de ls aldeanos. Hai quien querga ber nessa abintura ua crítica de l muro de Berlin, mas la berdade ye que debisones cumo essas, seia ne l mundo, seia nas pequeinhas quemunidades, seia nas famílias, solo puoden dar para mal i naide ganha nada cun esso. Todos nós coincemos bien la cuonta de las siete brimes que tamien fala de ls porblemas traídos pula debison.
La traduçon de l títalo desta abintura de Asterix, para mirandés, ye «L Galaton». Muitas outras heipóteses se ponírun cumo «L Guiron», «L Sanjon» (esta heipótese fui la scolhida pa la traduçon castelhana, «la gran zanja»), «L Balado», «L Canalon», etc. La palabra galaton fui aperpuosta por Domingos Raposo i cuido que ye la melhor de todas. L que ye un galaton? Ye ua foia larga i fonda que debide dues porpiadades, tenga eilha sido feita pulas pessonas (por eisemplo para nun deixar fazer carreiron a las pessonas que pássan para outras porpiadades) seia feita pula auga, quando chuobe muito i deixa la tierra toda arrieirada.
Tamien fui Domingos Raposo quien aperpuso la buona seluçon quanto a l’ourige de la palabra galaton: eilha ben de «bala» a que se le acrecentou l oumentatibo –on, i an que l «b» se demuda an «g». Assi sendo, la palabra tenerá la mesma ourige de la palabra «balado», yá que ende l «b» nun se haberie demudado an «g». Essa ourige poderá ser l latin «valla» (plural de vallum). La mudança de l «b» an «g» ou de «g» an «b» ye algo que se dá cun outras palabras an mirandés, cumo amóstran ls seguintes eisemplos: goteira > boteira; goldres > boldres (cumo se lei an testo de Alfredo Cameirão publicado la sumana atrasada ne l Jornal Nordeste: « un mazmárria que solo sabie çtripar cigarros i anchir ls boldres de bino»). Ye possible que l mesmo se passe cula palabra lionesa (de Aliste) «galaza» que quier dezir balhe pequeinho.
Eiqui queda ua splicaçon que s’amponie, yá que la palabra «galaton» nun ye quemun a toda la tierra de Miranda, mas bien merece que ganhe nuoba bida i s’assome por outras jinelas. Quanto a outras cousas que ténen que ber cula nuoba traduçon desta abintura de Asterix, bamos a sperar que sala i las pessonas la puodan ler.
26 de Nobembre de 2006
Amadeu Ferreira
amadeuf@gmail.com
Abiso:
Este testo, cunsante las regras de la Cumbençon Ourtográfica de la Lhéngua Mirandesa i de la sue Purmeira Adenda, stá solo screbido cun L- an percípio de palabra, a la moda de l mirandés de Sendin.
