Solo hai mui pouco tiempo me dei de cuonta de cumo eilhi ne l Restelo, an Lisboua, ye un sítio adbogado a bielhos, pus yá bien anhos que Camões alhá puso un a deleriar delantre de l Teijo i de ls caminos bagamundos de ls pertueses. I digo esto porque onte, quando la tarde ampeçaba a scamalhar las selombras de l almuorço, tamien you andaba puli ne l rastro de José Leite de Vasconcelos. Yá çpachado, staba cun algue priessa de agarrar l altemoble i tornar al trabalho. Nesto, ua figura a acenhar me chama, un búltio todo de negro sentado nun scanho de piedra antre las arbles de l que yá fui chamado l Jardin de l Ampério, i hoije ye assi a modo ua preça de casa de l Centro Cultural de Belen, de ls Museus de Arqueologie i de la Marina, de ls Mosteiro de ls Jarónimos i dessa catedral que ye la pastelarie afamado puls sous pasteles. Bendo bien, era nobre todo aquel anquadramiento, an que l Teijo serbie de caixilho, i era desse quadro que habie salido la figura que me acenhaba. Al purmeiro relampo de ls uolhos, agarra-me un rostro ancho, cua tiesta a modo patacon antre arribas arrieiradas, nuns uolhos que le dan al aire que respira ua cierta nobreza, inda que la falta de ls dientes deixe ls beiços mais splanchados i angulhidos. Para alhá de l rostro, son las manos la sola parte de l cuorpo que se le bei, lougo stendidas para mi. Al chamamiento nun fui capaç de le rejistir i alhá me arrimei, antregando-le las dues manos de palmas buoltas al parriba. Falaba un pertués purfeito, l que me pareciu stranho al punto de le preguntar adonde moraba, Cascais, dixo, de to la bida, mas cuido que nun acraditei. Quitanas assi lembra-se-me deilhas quando era garotico i passában pulas rues de Sendin a ler la sina, cesta ne l braço chena de agulhas, linhas i cousas assi, a falar un spanhol çclarado: nun son ciganas, dezie mie mai, son quitanas i solo bíben de andar por ende cul bendilho, nun se dando de cuonta que las sues palabras querien dezir la mesma cousa, anque an lénguas defrentes. Zde garotico que le associei poderes stranhos a las quitanas, la magie de ler la sina i de adebinar l feturo, eilhas mesmas stranhas, pus solo aparecien a las bezes i sumien-se para siempre, al alrobés de ls outros ciganos, ls mercadores de burros i mulas, que dában la buolta a cada més i le coinciemos bien ls nomes i la família. Esta, que me chamaba ne l Restelo, era ua quitana, solo que falaba pertués. Toda de negro bestida, al son de las selombras que la bida le fui colando al cuorpo, l lenço bien agarrado a la tiesta cumo siempre ousórun las mulheres que me criórun, l bolso de l saiote a abultiar por ambaixo la saia a arrastrar pul suolo. Inda le quije preguntar l nome, mas, nun sei cumo, bieno-me l’eideia de que pessonas assi nun percísan de nome. Mirando ora para mi ora pa la palma de las manos, las palabras ampeçórun a correr cumo ribeira d’eimbierno molhado, l calantriç a ademudar cunsante las palabras, strefigurando-se cun eilhas, siempre cun un aire solene, de liturgie, uas bezes la debocion de quien reza, outras l spanto de quien adebina, meio a camino antre pitonisa i saçardotisa a scamugir ls males. Apuis ríen-se-le ls uolhos anquanto apega las palabras a las melhores culidades que un, qualquiera un, puode tener, cun Dius pul meio i porfissones de fé. Al fin, las ceilhas ban-se carregando i ampeça a falar ne ls peligros de males mui grandes ne l cuorpo, que hai que botar para fuora, mas que para esso ye perciso star çpuosto a pagar, nun hai que le tener amor al denheiro, i por ende alantre, acabando a sacar de l bolso de l saiote uns quadradicos andrento un plastiquito, que era essa la malzina para curar l grande mal que me amanaçaba ne l stómado. Staba bien çclarada i bien studada la tática: ambocaçon de Dius i scamugir de las fuorças de ls demonhos, agabar de las culidades de la pessona i abiso quanto als males de l’ambeija, i al fin l peligro de l mal grabe que ende ben i que hai que prebenir i curar culas fuorças duns quadradicos de papelon ambrulhados nun plastiquito, sendo altura de le pagar a la que ten ls poderes de essa malzina çctribuir pul mundo. Nun aceitei ls quadradicos de papelon i paguei-le l que achei justo por aquel trabalho, que la tie muito ha de haber treinado para l çcurso le salir tan bien i tan çclarado, mas nada de l que eilha querie. Ende, fui cumo se se abríran las narizes de todos ls aires malos que me íban a arrodiar pula bida fuora. Al modo que me fastaba, sentie-la, sentada ne l scanho, a guardar ls binte ouros ne l bolso de l saiote, dando grácias porque yá habie ganho para aquel die, mas preguntando-se, talbeç, porque nun fui capaç de que l miedo me bencira i la paga fura mais grande. A cierta altura sou ambolbido pul juntouro de polícias i de siguranças que muntában guarda a la runion de la CPLP, que se staba a dar ne l Centro Cultural de Belen. Solo se me lembra de haber pensado an cumo mos anganhamos al falar de l mundo, yá que nun eisiste un mundo, mas mundos sien fin, a las bezes sentados adonde menos pensamos, até mundos que cuidábamos zaparecidos, mas que acabamos por cuncluir que se nun sabemos deilhes ye solo porque nun andamos puls mesmos caminos. Talbeç un die destes torne puli i spreite, al loinge, por algun búltio negro culs uolhos a ler la sina de l Teijo.
amadeujf@gmail.com
Abiso:
Este testo , cunsante las regras de la Cumbençon Ourtográfica de la Lhéngua Mirandesa i de la sue Purmeira Adenda , stá solo screbido cun L- an percípio de palabra, a la moda de l mirandés de Sendin.
