Siempre stamos a ber cuncursos, classeficaçones, recordes i outras cousas assi subre algo que ye l melhor de l mundo. Pouca fé le pongo a essas cousas, mas esso nun me ampide de eiqui falar hoije subre la melhor salada de l mundo: la salada de regaho [l <h> lei-se cumo l spanhol <j>], que tamien le cháman merujas, mas cuido que será mais an pertués. Se diuses oubisse i quemíssen salada, pula cierta que serie de regaho. Stamos ne l tiempo del, que pouco dura i mal chega a la primabera. Forma sues muntelheiras dun berde relamposo an rieiros adonde l’auga cuorre debagarosamente, an morredeiros que nun chégan a spelhar-se an fuonte. Sues folhicas a modo de graninas prénden-se a un pencino sbranquenhado, cun raízes suoltas pula auga, a las bezes medrando cun outras yerbas a la mistura: ye ua pura yerba d’auga, sien chegar a ser ouca, que nun percisa de tierra para assentar sou crecimiento. Sega-se cun ua palaçuola de modo a nun agarrar la raíç, pegando-le cula punta de ls dedos, que todo nessa yerbica ye andeble, i pon-se an saquito ou fardelica adonde nun se mace i nien quede smoncaralhada. Apuis hai que labar l regaho bien labado i scolhé-le outras yerbas que béngan misturadas i stá todo pronto: azeite, binagre i sal a gusto, nun le quedando mal botar alhá ua cebolha segada algo fina. Quien nun conhece l sabor de l berde ye porque nunca comiu salada de regaho, dua fuorça armana a las suidades de luç que l’auga trai de las scuras antranhas de la tierra, un berde que ye un arrebento de primabera quando l eimbierno inda ateima nun quedar ampossible, un sabor an que todo ye andeble a puntos de ls própios dientes mais le fazéren fiestas do que berdadeiramente adentáren. Tierra sana, augas limpas i aires libres ye todo quanto mos pide l regaho: quien un die comiu salada de regaho ha de antender que ser andeble puode ser ua culidade tan grande que bal la pena todo fazer para que cuntine a assomá-se a nacientes i rieiros ou ancostando la palabra al modo de l poeta Gedeão, nun se come ampunemente salada de regaho.
amadeujf@gmail.com
Nota – Este testo nun usa lh- an ampeço de palabra tal cumo ye premitido pula 1ª Adenda a la Cumbençon Ourtográfica de la Lhéngua Mirandesa pa l mirandés de Sendin.
