Tengo benido eiqui a falar de quemidos que me quedórun zde siempre i que inda hoije torno a eilhes siempre que puodo. Houbo ua altura an que you cuidaba que ls nuossos quemidos éran fraca cousa por séren de giente probe: cuido que essa eideia inda stá antranhada ne l mais de la giente a puntos de, cumo eiqui yá dixe, l quemido mirandés que s’apersenta pouco passar de la puosta. Hoije, stou cumbencido que aqueilhes quemidos ambuolben ua beraddeira arte i ténen por trás todo un saber que ye mui amportante librar de l squecimento, porque faç parte de la nuossa eidentidade i de la nuossa anciclopédia de saberes ancestrales, i l nuosso gusto solo queda a ganhar cun esso. Alguien dixo que ua pessona ye aqueilho que come, mas you stou mais d’acordo cun outra que dijo que un ye l que fur la sue cozina, yá que fui la sue capacidade para cozinar que fizo l home: cozinar ye un ato de cultura, que muita beç ye eilebado a puntos de berdadeira arte i ambençon, i chega quaije a ser milagre quando nun hai muita cousa para fazer de comer. Por essa rezon ten benido a ser balorizada la cozina alantejana, tenendo loubores an to l lado, mas cuido que la cozina popular stramuntana nun le queda atrás i até será menos gordurosa, por eisemplo, cun sous sabores apurados a partir de cousas simpres i colhidas eilhi na huorta ou apanhadas pul campo. Lembra-se-me bien que un de ls nuossos quemidos de ls demingos, até de muitas fiestas, éran ls guisados, feitos nua bariadade tan grande que nien sei. Un simples guisado de patatas a las cachas cun chicha, cun un cinoés de pumiento [colorau, an pertués] porriba para le dar aqueilha quelor burmeilha i sabor, ne l eimbierno, ou cun berduras i tomates ne l berano, ye algo que you cuntino a fazer de tiempos a tiempos an mie casa i que ye mui ralo ber an restourantes mirandeses. Porquei? Será que las pessonas nun cómen esses pratos se le fúren oufrecidos? Cumo tal, you bou a Spanha i áchan-se pratos de guisados adondequiera i you ye ralo rejistir a pedi-los, mas nunca me sáben cumo ls nuossos. Hei de eiqui tornar als guisados, falando desse cunceito que ye guisar i de las sues bariadades.
amadeujf@gmail.com
Nota – Este testo nun usa lh- na ampeço de palabra tal cumo ye premitido pula 1ª Adenda a la Cumbençon Ourtográfica de la Lhéngua Mirandesa pa l mirandés de Sendin.
