L atrasado die 19 de Abril fizo quenhientos anhos que se dou ua grande matáncia de cristianos nuobos an Lisboua (1506). Ls jornales lembrórun l caso, houbo l salimiento de libros, palhestras i outras cousas assi.
Puode haber quien cuide que essas cousas l melhor ye squecé-las. Mas naide puode calhar l que l tiempo nunca calhará: las matáncias, cumo esta ou outras, siempre boziaran sangre, nun amporta l sítio i l tiempo an que se háian passado. Nun sei se la lembráncia puode ajudar an algo, yá que hai muito la manha de star siempre a repetir cumo se ciertas cousas tubíran qua ser spurmentadas. Seia cumo seia, ye nuosso deber nun squecer.
Cumo me fáltan las palabras para esta crónica, que yá dies há que ando para screbir, deixo-le la palabra a Damião de Góis (Crónica do Felicíssimo Rei D. Manuel, 1ª parte, cap. 102), scusando de dezir l porquei de todo se haber passado i quedando solo la cuonta:
«A esse albrote acudiu muito pobo a que un fraile fizo ua prática lucitando-lo contra ls crestianos nuobos, habendo salido apuis dous frailes de l mosteiro (de San Demingos) cun un curcefício nas manos boziando “heiresie!, heiresie!”, l que ajuntou muita giente strangeira, pobo, marineiros de naus que habien benido de Houlanda, Zelándia, Oustelándia i outras partes, i tamien homes de tierra de la mesma cundiçon i pouca culidade que, fazendo un juntouro de mais de quenhientos, ampeçórun a matar todos ls crestianos nuobos que achában pulas rues i queimában ls sous cuorpos, muortos i meibibos, an fogueiras que habien feito na Ribeira i nel Rossio, nesso sendo ajudados por scrabos i moços, que mui ables acartában leinha i outras cousas para acender l lume, i nesse demingo de Pascoela matórun mais de quenhientas pessonas. A este juntouro de homes malos i de ls frailes, que sien temor de Dius andában pulas rues lucitando l pobo para esta matáncia, s’ajuntórun mais de mil homes de la tierra, de la mesma culidade de ls outros, que todos a la ua, na segunda cuntinórun cun esta maldade inda cun mais rábia i cumo nas rues yá nun achássen nanhuns cristianos nuobos, fúrun-se cun scaladas a las casas adonde bibien ou adonde sabien que stában, i sacando-los dalá a la rastra pulas rues, culs filos, mulieres i filos, ls botában nas fogueiras stubísssen bibos ou muortos, sien nanhue piadade i era tan grande la chacina que até als garoticos i als ninos que stában no brício s’atirában, agarrando-los pulas piernas, spartiçando-los an cachos i sborraçando-los contra las paredes. I nun se squecien de le roubar las casas i rapinar to l ouro, prata i anxobales que alá achában».
Diç l mesmo Damião de Góis que la matáncia agarrou alredror de dues mil pessonas, mas Garcia de Resende fala an quatro mil. Si ye berdade que l rei D. Manuel I cundanou l que se passou i mandou matar ls repunsables, assi cumo dar un castigo a la cidade de Lisboua, mas yá todo se habie passado.
Tamien hoije se criou un Tribunal Penal Anternacional para julgar i cundanar ls repunsables de matáncias cumo aqueilha que se dou an Lisboua, i inda piores, mas solo apuis de las cousas se habéren passado. Las lágrimas arráman-se siempre apuis, mas éran bien scusadas las lágrimas cun que ls corricados «brandos questumes» báten ne l peito i ajúdan a acunhar uolho.
I quedo-me porqui, nun me baia algue tentacion moralista, cun Anquesiçon pul meio, a quedar ampapada de sangre. Hai cousas que yá nun bóndan palabras pa las dezir. Queda l bózio i ls sous ressonos, al meio de preinadas de siléncios sien fin.
16 de maio de 2006
Amadeu Ferreira
amadeuf@gmail.com
Abiso:
Este testo, cunsante las regras de la Cumbençon Ourtográfica de la Lhéngua Mirandesa i de la sue Purmeira Adenda, stá solo screbido cun L- an percípio de palabra, a la moda de l mirandés de Sendin.
