Todo aquel formigar de benediços solo tenie uolhos pa las bistas, nun matracar de retratos sin cunta. L Báltico staba mesmo al son pa que alhá pousáran ls uolhos çpindurados nas agulhas de ls campanairos de Tallin. Toda la bista alredror era mais prendediça que staca an puorta de labrador. L guia, que até nin falaba mal l pertués dua stada an Angola an trabalhos de madeira, spetaba l dedo acontra la casa adonde un die passara Pedro I, l grande csar de la Rússia. Era un regalo aqueilha cidade limpa i cun grandura de giente, agora património de l’houmanidade. Assi i todo, nun era capaç de zbiar ls uolhos de dues ties sentadas nun puial de piedra, a fazer cuorpo cula muralha mediabal. Nin un pestanhar, nin l tembraduro dua angúrria, serenas cumo l tiempo que ceçaba nas bóbedas douradas de las eigreijas ourtodoxas. Uas ties grandes i anchas, pa zaspero dun japonés que nun era capaç de las meter juntas i anteiras ne l retrato, tan acerca stában. Adabinaba-se-le un bulhir lebe de ls uolhos que solo podie benir daquel airico que fariaba las ralas nubres, yá que todos ls músquelos de la cara se l’habien acocado al burmeilho çpaporrado de las narizes. Solo ls dedos grandes de las manos bulhien para un lado i pa l outro a ampalpar l ameroso de ls miotes colgados de ls zinolhos. Porque nun le rógan culs miotes a esta giente? Que outra cousa poderien star eilhi a fazer, senó a bender miotes de lana que eilhas mesmas fazírun, cumbencidas de que aqueilhes benediços nin fazien eideia que inda se pudíran fazer miotes de lana a mano?
Aqueilhes miotes ancandilórun-me i ponírun-me a miles de quilómetros de lunjura. Yá nun era un puial ne l assomadeiro de las muralhas mediabales de Tallin, era la parede de l Sagrado de la mie tierra. Nin seinha dun benediço, mas la tie alhá cuntinaba sentada a la spera, sin priessa. L bagar faç miotes, questumaba dezir. L purmeiro benediço que passa bai-se lougo a el, cun aquel son apressiado d’ancambanar las piernas cumo parra fuora d’auga. I roga, i amostra, i bai atirando l précio, até que la pessona ye oubrigada a parar. Sou you que ls fago, filo la lana i todo, yá nun hai quatro que séian capazes de ls fazer cumo debe de ser, son solo dieç ouros que nin paga ls delores de cuostas. A las bezes yá s’ambaralha i roga-le ls miotes a algue rapaza nuoba que mora lougo eilhi, mas que le parece tener aire de baixo. Tamien eilha, cul tiempo, deixou de coincer toda aqueilha giente nuoba, subretodo quando la cara nun atira a la parentena. L’aldé fui-se-le tornando stranha, chena de pessonas doutra criaçon, roubada de ls canticos i oulores que la fazírun sue, cumo se cada die fura un ambarron para fuora de sue casa. Ye por esso que nunca quijo ir pa l lar de ls bielhos, essas casas que quédan fuora de l tiempo i de l spácio, adonde ls uolhos se pérden para alhá dun cielo de que yá deixórun de se le ber las streilhas. Gusta-le mais aqueilha scaleira de l Cruzeiro, a las bezes frie, queijeque siempre asselumbrada pula moreira, mas nunca alhena, que yá de garota s’afazira a ber de loinje l cunceilho que ls homes fazien to ls demingos alredror.
Quando afirmo ls uolhos ne ls miotes, bei-se bien que ls zeinhos son defrentes. Cumo nun m’habie dado de cuonta? Cun tanto friu que eiqui faç ne l eimbierno han de se agradecer bien. Han de tener manos ables, para fazer aqueilhes feitius todos. Talbeç ne l eimbierno quéden culs dedos angaranhidos a fazer miotes. Talbeç por esso téngan de star siempre cun eilhes a dar a dar, cumo se nunca parássen de fazer meia i siempre tubíssen miedo de quedar culs dedos angaranhidos. Inda po riba, a estas ties de Tallin nun hai lar de ls bielhos que le baia a casa a labar la roupa i a lebar l almuorço. Essa parte de la Quemunidade Ouropeia parece que inda nun tubo tiempo de chegar acá, que antrórun hai mi pouquito tiempo. Sei bien que ye assi, senó nun podien star eilhi a aqueilha hora, an que ls benediços se çpáchan a abeixar pa l almuorço. Assi i todo nun páran, cumo reboadas de storninos, i las ties ténen feira pa to l die.
Ls miotes, quando nun son para ousar, bénden-se ne ls puiales de ls assomadeiros de las muralhas, nas paredes de ls Sagrados, naqueilhes sítios adonde l tiempo s’ancundesou. Hai a ties que atéiman an fazé-los, anque sában bien que solo se los cómpran para çpindurar l tiempo. Que l’amporta a eilhas que çpindúren alhá l tiempo ou l que seia? A soutordie han de tornar, anquanto las piernas le díren fuorças pa chubir las scaleiras de l castielho cheno de benediços. Que mais puode bender quien yá nun ten piernas pa ls miotes, mas inda puode meter alhá cachos dun tiempo que yá nun anda?
Ua de las ties bendiu agorica mesmo un par de miotes. Son 30 crouas ou dous euros, que la tie ten l précio screbido nun papelico an riba l mandil. Anquanto l cumprador se bai ambora, la tie droba-se nua dénia que le pon ls uolhos a mirar pa ls zinolhos. Yá sentada ne l puial, saca un lienço de l bolso de l mandil i zata-le l nuolo que ten na punta. Ls tocos de ls dedos yá se l’ancatrapílhan uns ne ls outros, las unhas relúmbran a amarielho de matéria cun sue corona negra alredror, mas slúbian-se pula drobeç de l nuolo cumo cabra puls piquetes. Apuis de zatar l nuolo, cunta las monendas todas, debagarico, cumo quien quier agarrar todo l gusto dun manjar. Ajunta-las outra beç na punta de lienço i torna-le a dar l nuolo, ajeitando-lo cumo se fura possible que quedara sin angúrrias. Apuis torna a colgar outros miotes de ls zinolhos, ajeita uns pelos que se l’assomórun por ambaixo l lienço de la cabeça i buolbe-se outra beç fincon, solo ls uolhos lebados por aquel airico lebe, apuntados al Báltico raso, punto branco donde siempre assópran ls frius. Yá sin benediços ne l assomadeiro de las muralhas de Tallin, l japonés, al fin, ganhou campo para prender aquel cachico nun retrato. A aqueilha mesma hora, a miles de quilómetros para adonde l sol se çpon, naide stá sentado nas scaleiras de l bielho Cruzeiro, que la çfrença de las horas fai çfrente un mundo que nunca deixou de ser armano.
Hai cientos ou miles d’anhos, nun tiempo an que Tallin inda nun sonhaba cun muralhas, ua tie ateimaba an acumpanhar un guerreiro que iba para Sul, fazendo ua jura: nun le faltarie calor pa l coraçon i siempre lo asperarie nas muralhas de todos ls castielhos, ne ls sagrados de todas las eigreijas, pa le limpar l sangre i le oufrecer miotes que nun deixáran que l friu le tolhira ls pies nin l peso de l tiempo l’assujeitara la drobeç de las piernas. Cunta-se que la tie perdiu l sou guerreiro, mas nunca quijo acraditar que se houbira morrido. An beç de asperar que apareça un die, anda a saber del sin paraije, siempre cun un manhuço de miotes a la mano, nun le baia a salir culs pies angaranhidos. Aparece adonde naide la spera, arrima-se a bielhas muralhas yá zbarrulhadas, perde-se puls Sagrados, çacansando ne l scalon que aguanta ls braços abiertos de ls cruzeiros.
8 de Setembre de 2005
Amadeu Ferreira
amadeuf@gmail.com
Abiso:
Este testo, cunsante las regras de la Cumbençon Ourtográfica de la Léngua Mirandesa i de la sue Purmeira Adenda, stá solo screbido cun L- an percípio de palabra, a la moda de l mirandés de Sendin.
