Caminos que l pertués nun puode açagar

  A las bezes hai a palabras que se méten por caminos para tan loinge de casa que acában por se perder, nunca mais se sabendo deilhas ne l sítio de adonde salírun. Muito tiempo apuis, se quijirmos buscar l camino para essas palabras tornáren a casa, solo hai un modo de las achar, que ye ir a saber deilhas al sítio adonde se quedórun apuis daqueilha purmeira caminada. Esto mesmo se dou cun ciertas palabras que hai muito tiempo benírun de l pertués pa l mirandés, nun quedando registros bastantes na léngua pertuesa de adonde salírun. I l modo de poder recustituir cumo haberá sido la família dessas palabras an pertués ye ir a saber deilha al mirandés. Cuido que ua dessas palabras ye ‘açagar’ que, an mirandés, quier dezir, antre outras cousas, ‘nun aporbeitar, stragar’. Cun eilha stan liados ls deribados ‘agaçador, açagadeira, açagadeiron, açago i açagar-se’, todos eilhes mui bibos na léngua mirandesa. Bamos, anton, a ber algues de   las cuontas que esta família de palabras mos cunta. Cumo las pessonas, tamien algues palabras eimígran duas lénguas pa las outras: hoije aqueilhas palabras son bien mirandesas, mas chegórun eiqui porque que un die ls sous antrepassados eimigrórun pa l mirandés.

Hai alguns dicionairos de pertués que regístran la palabra ‘açagador’, mas cumo palabra antiga, yá nun ousada, cul sentido de ‘cuteleiro, serralheiro, armeiro’. Mas la berdade ye que yá Viterbo la daba cumo antiga i zousada ne l percípio de l seclo XIX. Segundo este outor, ‘açaagador’ era l que «açacalava, polia, dava corte e afiava todo o género de ferramentas e armas». Cita an apoio un decumiento de 1425 adonde se fala dun cierto Joham Lourenço açaagador. Diç Mário Fiúza que la palabra ‘açaagador’ «é uma forma divergente de ‘açacalador’, produto da seguinte evolução fonética: açacalador > açagalador > açagaador > açagador. Açacalador é, por sua vez, derivado de açacalar, proveniente de um substantivo masculino açacal que veio do árabe aç-çaqal, alfajeme, brunidor de armas, de çaqala:   pulir.»

Mas ls mesmos dicionairos de pertués inda regístran ‘acaçalar’ cumo palabra hoije ousada i ls dicionairos de castelhano regístran ‘acicalar’, ambas a dues cul mesmo sentido. Ls outores (Machado - DELP, açacalar i Corominas – DCECH, acicalar) cuncórdan que haberá benido de l árabe ‘aç-çaqal’. Stá yá decumentada, pa l castelhano, cula forma ‘acecalar’ an 1270, sendo essa la forma mais ousada na Eidade Média i ne l seclo XVI. La forma ‘açacalar’ stá yá decumentada, pa l pertués, ne l seclo XVI.

Se l que ls outores dízen stubir cierto, anton todo parece andicar que la palabra mirandesa ‘açagar’ i sous deribados haberá benido de l pertués i nó diretamente de l árabe ou pul camino de l castelhano. Dun lado, solo assi se splica que la palabra mirandesa seia ‘açagador’ i nó ‘açagalador’, quier dezir, solo assi se splica que haba perdido l -l- antrebocálico; doutro lado, bonda mirar pa las dues formas i ber que la mirandesa i la castelhana nada ténen a ber ua cula outra.

Anton, se la palabra mirandesa bieno de l pertués, hai que splicar dues cousas: que tenga un sentido çfrente an mirandés i ne l pertués antigo; que ne l pertués antigo solo steia decumentada la forma ‘açagador’ i nó las outras que inda se manténen mui bibas an mirandés.

Bamos purmeiro al sentido que cuido nun ouferecer deficuldades: l sentido oureginal de ‘polir’, ‘zgastar’, apunta pa la necidade de nun se aporbeitar ua cierta parte de l material para que el quede polido. Por esso, podemos dezir que l sentido mirandés ben nua eibeluçon natural zde l sentido oureginal. Mas todo andica que esta eibeluçon se haberá dado an mirandés i nó an pertués, pus eiqui nunca quedou registrado esse sentido an nanhue de las formas de la palabra. I la palabra haberá antrado ne l mirandés yá an era bastante antiga, nua altura an que inda starie biba an pertués, l que parece apuntar pa ls seclos XV-XVI. Portanto l mirandés agarrou aqueilhas palabras cumo sues i fizo-le eibeluir l sentido de modo dibergente zde l sentido oureginal an pertués, até porque yá tenie outras palabras cul sentido oureginal de açagar, cumo ‘aguçar’ i ‘afilar’.

I cumo splicar que la palabra apersente an mirandés ua berdadeira família cun bárias formas i que an pertués antigo solo steia decumentada la forma ‘açaagador’ ou ‘açagador’? Cuido que solo hai dues possiblidades: ou aqueilhas palabras yá se formórun an mirandés; ou benírun todas eilhas de l pertués, mas eiqui nun quedórun an nanhun decumiento, talbeç porque fúran mais populares, menos eiruditas para ser screbidas. Cuido que las dues heipóteses son possibles, mas parece-me mais cierta la segunda, yá que las palabras mirandesas son formadas naturalmente i fázen-le falta a la fala, rezon por que tamien eisistirien an pertués. Assi, nun habendo quedado decumentadas i habendo deixado de ser ousadas, las palabras pertuesas perdírun-se, cun eiceçon de ‘açagador’. Esto quier dezir que hoije l mirandés ye, possiblemente, la sola fuonte que hai para recustituir aqueilha família de palabras de l pertués antigo.

De l que acabemos de dezir se puode ber cumo ándan mal abisados ls studiosos de l pertués que çprézian l mirandés ou se squécen del   cumo ua de las fuontes possibles para melhor coincer l pertués antigo. Esses studiosos sáben que l’anfluença de l pertués ne l mirandés ye mui antiga, mas squécen-se que l mirandés ye mais cunserbador i guardou, cumo nua lazena, muita palabra que l pertués deixou de ousar i deilhas nun quedou cun qualquiera registro.

Cumo ye sabido, la léngua mirandesa i la léngua pertuesa tubírun ouriges i seguírun por caminos defrentes, anque dambas a dues téngan ido a buer al latin. Assi i todo, houbo partes an que las dues lénguas se ancuntrórun i anfluenciórun. Coincer bien l pertués ye mui amportante para bien coincer algues eibeluçones que tubo l mirandés. Mas nun ye menos berdade que coincer bien l mirandés puode ajudar a un melhor coincimiento de l pertués. Quaijeque siempre esta léngua, que ye tamien nuossa, se mos apersenta oupada de proua, mas a la bezes un cachico mais de houmildade tamien le pintaba.

17 de Dezembre de 2005

Amadeu Ferreira

amadeuf@gmail.com

Abiso:

Este testo, cunsante las regras de la Cumbençon Ourtográfica de la Léngua Mirandesa i de la sue Purmeira Adenda, stá solo screbido cun L- an percípio de palabra, a la moda de l mirandés de Sendin.