Rezas i Ouraciones arrecolhidas an Sendin
13. Reza para curar la boqueira
Ah luzicas
de l lhado d’alen
curai l miu menino
de las aftas que ten.
Anformante Albertina Moreno
Recuolha Amadeu Ferreira (2000)
Nota - La boqueira era un mal mui grande que daba na boca, subretodo ne ls garotos. L’ouracion tenie que ser dezida nuobe dies seguidos (nobena), a la nuite, i nuobes bezes a cada die. Quando se dezie l’ouracion la pessona tenie que star buolta pa las streilhas, yá que l pedido ye feito diretamente a las streilhas i nó a un santo ou a Dius. Por esso, este ye l causo mais stroudinairo que conheço (outros haberá) de remenicéncias de l culto de ls astros, de que falaba San Martino de Braga (séc. VII), ne l sou lhibro De Correctione Rusticorum: “Alii adorabant solem, alii lunam uel stellas, alii ignem, alii aquam profundam uel fontes aquarum...” [Uns adorában l sol, outros la lhuna ou las streilhas, outros l fuogo, outros las augas fondas, outros las fuontes].
A.F.
