La Cantiga de l Mirandun
Ye coincida de todo mundo la Cantiga de l Mirandun, un lhaço de ls nuossos dançadores. Essa cantiga, que faç parte de la lhiteratura oural mirandesa, fui publicada pula purmeira beç por Manuel Ferreira Deusdado ne l jornal Commercio de Portugal, de 22 i 23-12-1893. Eiqui queda esta cantiga, tal i qual cumo aquel outor la publicou (hai outras bersiones algo çfrentes), screbida cunsante las regras de la Cumbençon Outográfica de la Lhéngua Mirandesa.
Mirandun se fui a la guerra
Mirandun se fui a la guerra
Mirandun, Mirandun, Mirandela
Nun sei quando benerá.
Se benerá pula Páscoa
Se benerá pula Páscoa
Mirandun, Mirandun, Mirandela
Se pula Trenidade.
La Trenidade se passa
La Trenidade se passa
Mirandun, Mirandun, Mirandela
Mirandun nun ben yá.
Chubírun-se a ua torre
Chubírun-se a ua torre
Mirandun, Mirandun, Mirandela
Para ber se lo abistában.
Bírun benir un paije
Bírun benir un paije
Mirandun, Mirandun, Mirandela
Que nobidades trairá?
- Las nobidades que traio
Las nobidades que traio
Mirandun, Mirandun, Mirandela
Bos han-de fazer chorar.
Tirai las quelores de gala
Tirai las quelores de gala
Mirandun, Mirandun, Mirandela
Ponei bestidos de lhuito.
Que Mirandun yá ye muorto
Que Mirandun yá ye muorto
Mirandun, Mirandun, Mirandela
You bien lo bi anterrar.
Antre quatro oufeciales
Antre quatro oufeciales
Mirandun, Mirandun, Mirandela
Que lo íban a lhebar.
Algo se ten screbido subre l’ourige desta cantiga i de que tiempo benerá: Manuel Ferreira Deusdado diç que ye ua cantiga subre l capitan Ferreira Deusdado, que el faç heirói de las Guerra de ls Siete Anhos ou de l Pacto de Família, tamien coincida, por bias daqueilha lhienda, cumo Guerra de l Mirandun; António Maria Mourinho diç que haberá benido de Fráncia, nó antes de l seclo XVIII.
23 de Outubre de 2006
Amadeu Ferreira
