POETAS DE L DOURO
16. Luís de Camões
Camões nun se puode cunsidrar un poeta de l Douro. Mirando Ls Lusíadas, fala de l Douro an quatro stáncias i an todas eilhas de raspion, sin que an nanhun desses casos l riu seia tenido an cuonta por el mesmo.
Camões nun faç çfréncia an relaçon a outros antigos poetas pertueses, que éran poetas de l Teijo ou de l Mundego, nunca querendo saber de l Douro para nada, que quedaba mui loinje de la corte ou de ls amores de ls studantes-poetas de Coimbra. Ne l Cancioneiro de Garcia de Resende, nunca aparece l Douro, mas l Teijo aparece 3 bezes. Este ye un riu de poesie fácele, yá que stá mais acerca de ls poetas i le entra puls uolhos, amostrando que la poesie stá mais liada a la giografie do que parece. Bien çfrente ye l Douro, un riu que mete miedo, custoso de derretir an poesie, subretodo nun tiempo an que miles de manos inda nun le habien zbulhado la costra que metie miedo. Diç Frei Bernardo de Brito, na sue «Monarquie Lusitana» (1597) a respeito de l Douro: «Sua corrente é pouco alegre à vista, por ser sempre entre serras asperíssimas, & ir mui furiosa, & desacompanhada de campos, & arvoredos, com que os rios costumam ser aprazíveis. Suas águas são tristes, péssimas, para quem é tocado de melancolia, & aos tais causa repentinamente grandes dores de cabeça. As fermosas têm mui pouca obrigação a suas águas, porque faz o carão preto, & áspero, de modo, que nestes, & nas mais calidades, é em tudo contrário ao Tejo».
Ls poetas de Santaren i Lisboua cántan l Teijo, ls de Coimbra l Mundego i Diogo Bernardes l sou Lhímia, solo para dar alguns eisemplos. Mas, cumo diç Fernando Pessoa, para cada un l riu mais amportante ye l riu de la sue tierra. A las bezes l riu de cada un puode até ser un riu manginado, cumo ls Rius de Babilónia – l Trigre i Oufrates - , adonde Camões chora l sou eisílio loinge de la pátria, cumo ls judius çterrados, nun de ls mais stroudinairos poemas que el screbiu, chamado «Solobolos rios que vão / por Babilónia me achei».
Assi i todo, para Camões l Douro ye un riu de refréncia que lo ajuda a defenhir l’eidentidade de Pertual i ls sous lhemites. Sien esse riu, Pertual nun serie l mesmo, i dezir esso ye dezir muito. Ye un outro modo de ber l Douro, yá nó cumo un riu de prossemidade, mas cumo ua de las struturas de l paíç, cumo ua seinha de eidentidade de cierta parte de Pertual.
André de Resende chama-le al Douro l Riu de ls Mirandeses (Antiquitatibus Lusitaniae, 1593) i del diç que ye «celebradíssimo pela sua beleza e pelo testemunho dos escritores, supera o Tejo na massa de água com a diferença que esta vem mais comprimida, dado que corre quase sempre por um leito entre montanhas, enquanto o Tejo se expande até à ostentação por campos desimpedidos e planos. Daí que é costume dizer-se entre nós à laia de provérbio: “O Tejo leva a fama e o Douro arrasta as águas”». La berdade ye que esses scritores de que fala André de Resende son scritores antigos i nó ls de l tiempo de Camões ou que antes del bibírun an Pertual. Mas bóndan-mos essas palabras guapas de André de Resende, inda porriba chamando-le al Douro Riu de ls Mirandeses.
Bamos anton a deixir eiqui ls bersos adonde Camões fala de l Douro, andicando l canto i la stáncia adonde quédan.
a) IV, 28
Eiqui se diç cumo fui l ampeço de la batalha de Aljubarrota. Para melhor amostrar l que fui essa medonha batalha, l poeta pon l sou rugido a oubir-se loinge i a dar-le grima até als grandes rius. Eiqui ls trés grandes rius pertueses, Douro, Teijo i Godiana, reperséntan todo l paíç, l Norte, l Centro i l Sul, yá que era l çtino deste paíç que se staba a resolber naqueilha batalha.
Dou sinal la corneta castelhana,
Medonho, brabo, fuorte i temeroso;
Oubiu-lo l monte Artabro, i l Godiana
Atrás bolbiu las óndias, de medroso;
Oubiu-lo l Douro i tierra alantejana;
Corriu pa l mar l Teijo dubidoso;
Las mais, que l son terrible eilhi scuitórun,
Als cuolhos ls filhicos apertórun.
b) VI, 53 / 54
Stamos eiqui ne l eipisódio chamado de ls Doze de Anglaterra, an que fala l Magriço. L Douro ye tratado cumo riu afamado, cun muita nomeada, mas na stáncia 54 acaba por repersentar l paíç de que yá bai anfadado, amostrando gana de coincer nuobas tierras, nuobas gientes i nuobas culturas:
De l sou Rei yá agarrórun la licéncia,
Para salir de l Douro nomeado,
Aqueilhes que scolhidos por senténcia
Fúrun pul Duque Anglés mui spurmentado.
Nun hai na companhie algue defréncia
De cabalheiro, able ou mui sforçado;
Mas un solo, que Magriço se dizie,
Assi fala a la fuorte cumpanhie:
– «Balientes cumpanheiros, you deseio
Hai muito yá d’andar an tierras stranhas,
Pa ber mais augas que de l Douro i Teijo,
Defrente giente i leis i bárias manhas.
Agora que bun tiempo cierto beio,
(Pus de l mundo las cousas son tamanhas)
Quiero, se me deixais, ir solo a tierra,
Porque starei cun bós an Anglaterra.
c) VIII, 3
Paulo de la Gama splica al Catual quien ye Luso, l que le dou l nome a la Lusitánia, que tenerie andado de l Douro para baixo, até al Godiana. Esta eideia yá ye antiga, ponendo-se l Douro cumo l lemite Norte de ls Lusitanos, l que nun anda loinge de la berdade. Nesse sentido cumo que se deixa dezido que al norte de l Douro ye un outro mundo. Ye bien stranha essa eideia de Camões, pus al poner Luso solo al sul de l Douro i dando-le l nome de Ls Lusíadas al sou poema, ye cumo se la giente a Norte de l Douro quedasse de fuora desse poema i de l’eipopeia que el canta. Mas para Camões i alguns scritores pertueses antigos, la Lusitánia fui-se stendendo parriba de l Douro, nua eideia de colar todos ls pertueses als Lusitanos i de fazer passar las frunteiras destes pulas frunteiras de Pertual. Esse mito inda hoije se manten an muita cabeça.
Fui filho i cumpanheiro de l Tebano
Que tan defrentes partes cunquistou;
Parece haber benido al nial Spano
Trás de las armas, que cuntino ousou.
De l Douro, Godiana l campo chano,
Yá dito Eilísio, tanto l cuntentou
Que eilhi dar quijo als yá cansados uossos
Eiterna sepultura, i nome als nuossos.
Amadeu Ferreira
19 de Júlio de 2006
Abiso:
Este testo, cunsante las regras de la Cumbençon Ourtográfica de la Lhéngua Mirandesa i de la sue Purmeira Adenda, stá solo screbido cun L- an percípio de palabra, a la moda de l mirandés de Sendin.
