POETAS DE L DOURO
10. Federico Acosta
Federico Acosta Noriega (1908-1985), naciu an Jaén mas passou l mais de sue bida cumo juíç an Çamora, sendo un apaixonado por Fermeseilhe.
L poeta fala de l riu que siempre serbiu para ounir i nó para apartar, un riu que ye un abraço. L riu nun passa de un pretesto para falar de amisade i buona bezinança. Anque l poeta diga que nun téngamos miedo de atrabessar la raia, bien sabemos que esso solo bal para agora. Datrás las frunteiras éran fortalezas i habie que las passar a las scundidas de ls guardas i carabineiros. Inda bien que todo esso passou i ouxalá dure para siempre.
Para quien naciu a mirar Fermeseilhe de l outro lado, solo cul outro lado se puode sentir anteiro: tanto cumo de ls formoselhanos, Fermeseilhe siempre fui de ls nuossos uolhos, a modo un speilho de ber l mundo, i esso nunca naide fui capaç de mos tirar, yá que era esissencial para nós, indo alhá sien tener que atrabessar l riu. Por esso se puode dezir que Sendin nun serie l mesmo sien Fermeseilhe i l alrobés tamien ye berdade.
Douro raiano
D’atrabessar la frunteira
nun te deia grima armano
porque l bun fermoselhano
te spera nesta ladeira.
Que pula mesma ribeira
ban augas de l mesmo riu
para tou fazer l miu
i por sue mesma corriente
recibe la paç ardiente
l abraço que me saliu.
L Douro nun lieba l ouro
cun que sou nome batiza
mas sue bena bien que zliza
d’amisade mie l tesouro.
Bielha amisade q’antesouro
ardança de mius maiores
pus tous amigos melhores
seran ls fermoselhanos,
pus un aperton de manos
te recibe an mil amores.
Que las corrientes de l Douro
lieben na sue turbuléncia
amboras de l’ampacéncia
cun que tue bejita spero.
Que siempre serás purmeiro
an recebir cortesie,
pus tengo tanta alegrie
que nun m’hei de acurtiar
pa cun Porto saludar
por tue amisade i mie.
L que mos aparte un riu
quando ounido al coraçon
ye bien pequeinha rezon
para que haba algun zbio.
Se tu sós amigo miu
atravessa l riu sien mal
i nun abraço armanal
juntemos nuossa cumpanha.
Tu gritarás Biba Spanha
Cun miu Biba a Pertual.
Traduçon de Amadeu Ferreira
an 3 de Maio de 2006
Abiso:
Este testo, cunsante las regras de la Cumbençon Ourtográfica de la Lhéngua Mirandesa i de la sue Purmeira Adenda, stá solo screbido cun L- an percípio de palabra, a la moda de l mirandés de Sendin.
